Ukrayna Prezidenti Volodimir Zelenski, Türkiyə Prezidenti Rəcəb Tayyib Ərdoğanla telefon danışığının ardından sosial mediada paylaşım edib. Zelenski paylaşımında: “Türkiyənin göstərdiyi bütün yardımlara böyük dəyər veririk. Həqiqi sülhün təmin olunması üçün göstərilən daimi hazırlığa və qətiyyətə minnətdarıq” deyə bildirib.
Sherg.az xəbər verir ki, Zelenski, danışıqlarda mövcud vəziyyətin və diplomatik addımların müzakirə edildiyini qeyd edib. O, Ukraynanın liderlər səviyyəsində müzakirələrə hazır olduğunu vurğulayaraq: “Təəssüf ki, bu formatdan yayınan və müharibəni davam etdirən Rusiyadır” sözlərini deyib.
Son hücumlara da toxunan Zelenski, Rusiyanın ötən gecə Ukraynaya 30-dan çox raket və təxminən 600 PUA atdığını, hücumlarda 4-ü uşaq olmaqla 17 nəfərin həyatını itirdiyini bildirib. Onlarla yaralının vəziyyətinin ağır olduğunu vurğulayan Zelenski əlavə edib: “Hücumlarda bir türk şirkəti, Azərbaycan səfirliyi, Aİ nümayəndəliyi və yaşayış məntəqələri hədəf alındı. Bu, Ukrayna, ABŞ və Avropalı tərəfdaşlarımızın sülhü təmin etmək səylərinə Putinin verdiyi cavabdır.”
Zelenski, Rusiyaya qarşı təzyiqin artırılmalı olduğunu, bunun üçün sanksiyalar, gömrük rüsumları və siyasi tədbirlərlə daha güclü addımlar atılacağını gözlədiyini ifadə edib.
Təhlükəsizlik təminatlarının da görüşdə müzakirə edildiyini bildirən Zelenski, milli təhlükəsizlik müşavirlərinin işlərini davam etdirdiyini və çərçivənin gələn həftə yazılı hala gətiriləcəyini açıqlayıb.
Prezident əlavə edib ki, Ərdoğan xüsusilə Qara dənizdə təhlükəsizliyin təmin olunması üçün Türkiyənin necə töhfə verə biləcəyini qiymətləndirmək məqsədilə müdafiə nazirini prosesə daxil edib.
