İsrail Baş naziri Benyamin Netanyahu ABŞ Prezidenti Donald Trampla görüşmək üçün Vaşinqtona gedib.
Sherg.az xəbər verir ki, səfər öncəsi İsrail mediasında yayılan xəbər İranla bağlı yeni hücum ehtimalını gündəmə gətirib.
"Jerusalem Post" qəzetinin məlumatına görə, Netanyahu İranın nüvə proqramını yenidən qurmaq cəhdlərinə qarşı hərəkətə keçmək üçün ABŞ Prezidenti Donald Trampdan “yaşıl işıq” istəyəcək.
"Jerusalem Post"a danışan israilli bir mənbə bildirib:
“Əsas məqsəd Livandakı vəziyyətə bənzər bir icazə almaqdır. Yəni nüvə sahəsində şübhəli fəaliyyət müşahidə olunarsa və ya ABŞ və İsrailin vurduğu bölgələrdən uran daşındığına dair sübutlar olarsa, buna qarşı öncədən ABŞ-ın razılığı ilə hərəkət ediləcək.”
Xəbərə görə, İsrailin məqsədi İranın nüvə proqramını bərpa etməsinin qarşısını almaq üçün ABŞ-nin rəhbərliyi ilə bir mexanizm yaratmaqdır.
Həmin rəsmi əlavə edib: “İran Beynəlxalq Atom Enerjisi Agentliyi ilə əməkdaşlıq etmədiyi üçün ona qarşı yenidən sanksiya mexanizminin tətbiqini istəyirik.”
İran Prezidenti Məsud Pəzəşkian ötən həftə agentliklə münasibətləri dayandıran qərarı imzalayıb. Nüvə müfəttişləri də təhlükəsizlik səbəbi ilə İranı tərk etdiklərini bildiriblər.
Bu gün Vaşinqtona çatan Netanyahu İsraildən ayrılmadan öncə jurnalistlərə verdiyi açıqlamada deyib:
“İranın bizim məhvimizə yönəlmiş nüvə silahı axtarışına yenidən başlamaq cəhdlərinə qarşı ayıq-sayıq olmalıyıq.”
