Qazaxıstan Prezidenti Kasım-Jomart Tokayev Qazaxıstanın etibarlı dostu olan Azərbaycana Asiyada Qarşılıqlı Fəaliyyət və Etimad Tədbirləri üzrə Müşavirədə (AQEM) yüksək səviyyəli sədrliyinə, dialoqun, etimadın və tərəfdaşlığın möhkəmləndirilməsi, eləcə də AQEM-in institusional inkişafına verdiyi töhfəyə görə səmimi minnətdarlığını bildirib.
AZƏRTAC Qazaxıstan Prezidentinin mətbuat xidmətinə istinadla xəbər verir ki, bu barədə dövlət başçısı Astanada AQEM-in qərargahının açılışında çıxışı zamanı deyib.
Qazaxıstan Prezidenti Asiyada AQEM-in bütün iştirakçılarının hamısına uğurlar arzulayıb.
“Biz həmişə əmin olmuşuq ki, yalnız əməkdaşlığın, qarşılıqlı anlaşmanın və dialoqun inkişafı davamlı sülhə, sabitliyə və rifaha nail olmağa imkan verə bilər. Müasir şəraitdə etimadın möhkəmləndirilməsi üzrə AQEM-in prinsipi hər zamankından daha aktualdır. Asiyanın təxminən 90 faizinin əhatə olunduğu və dünya əhalisinin yarıdan çoxunu təmsil edən AQEM beynəlxalq münasibətlər arxitekturasının inkişaf edən mühüm elementidir”, – deyə Tokayev qeyd edib.
