Yeni Zelandiyada bir qadın 6 və 8 yaşlı iki övladını öldürüb, meyitlərini illərlə çamadanda gizlətməkdə təqsirli bilinib.
Sherg.az xəbər verir ki, Auckland Ali Məhkəməsinin münsiflər heyəti 2022-ci ildə çamadanların içində tapılan uşaq meyitləri ilə bağlı məhkəmə işində qərar verib.
Münsiflər heyəti Hakyung Lee (45) adlı qadının vəkilləri tərəfindən edilən müdafiəni rədd edərək, Leeni Minu Jo (6) və Yuna Jonu (8) 2018-ci ilin iyununda öldürməkdə təqsirli bilib.
Lee cinayətdən sonra doğulduğu yer olan Cənubi Koreyaya qaçmış və orada adını dəyişmişdi. Uşaqların meyiti 2022-ci ildə Aucklanddə bir anbarda tapılmış, Lee isə bundan sonra Cənubi Koreyada həbs edilərək Yeni Zelandiyaya təhvil verilmişdi.
Lee müdafiəsində ittihamları rədd etmiş, cinayət vaxtı əqli sağlamlığının yerində olmadığını iddia etmişdi. Onun vəkilləri də Leenin uşaqlara antidepressant dərman verərək öldürdüyünü qəbul etmiş, lakin müvəkkillərinin əsəb böhranı keçirdiyini əsas gətirmişdi.
