HƏMAS hərəkatı Livan və İsrail arasında 24 noyabr 2024-cü il tarixində əldə olunan atəşkəs razılaşmasına tam sadiq qaldığını bəyan edib.
Teleqraf xəbər verir ki, bu barədə hərəkatın Beyrutdakı rəsmi nümayəndəsi Əhməd Abdel Hadi məlumat verib.
Əl-Mayadin telekanalı HƏMAS rəsmisindən sitat gətirərək bildirib: “Təşkilat rəhbərliyi Livanın cənubunda atəşkəs rejiminə riayət etmək niyyətində olduğunu Livan hakimiyyətinə çatdırıb. Biz Livanda sabitliyi dəstəkləyirik və bu ölkənin qanunlarına tabeyik”.
O həmçinin vurğulayıb ki, HƏMAS yaraqlıları əvvəllər Hizbullah, Əməl hərəkatı və Əl-Cəmaə əl-İslamiyyə ilə birgə İsrailin təcavüzünə qarşı fəaliyyətlərdə iştirak ediblər.
Abdel Hadi martın 22 və 28-də Livanın cənubundan İsrail ərazisinə edilən hücumların Qəzza zolağında fələstinlilərin kütləvi qətliamına cavab olaraq bəzi gənclər tərəfindən fərdi şəkildə həyata keçirildiyini bildirib: “HƏMAS bu hücumlardan əvvəlcədən xəbərdar olmayıb və onlara sanksiya verməyib”.
Qaçqın düşərgələrindəki Fələstin qüvvələrinin tərksilahı məsələsinə toxunan HƏMAS sözçüsü qeyd edib ki, bu məsələ Fələstin daxilində keçiriləcək dialoq zamanı ortaq mövqe ilə həll ediləcək.
