Gürcüstanın Laqodexi rayonunda təbii fəlakətin nəticələrinin aradan qaldırılması üzrə operativ qərargah yaradılıb.
Teleqraf-ın yerli bürosu xəbər verir ki, Areşi və Qabal çaylarının daşması səbəbindən rayonun ən çox azərbaycanlıların yaşadıqları Qabal, Gəncəli, Uzuntala və Qaracalar kəndləri zərər çəkib.
İki gündür davam edən intensiv leysan səbəbindən kəndlərdəki yaşayış evlərinin birinci mərtəbələrini, həyətləri və həyatyanı torpaq sahələrini su basıb. Laqodexi-Qabal-Qurcaani yolunda avtomobillərin hərəkəti dayandırılıb.
Soydaşlarımızın içməli suya, ərzaq məhsullarına və gigiyenik vasitələrə ehtiyaclarının qarşılanması üçün dəstək aksiyası elan olunub.
Təbii fəlakət zonasına yerli icra hakimiyyətinin bütün müvafiq xidmətləri səfərbər olunub, fəsadların aradan qaldırılması üzrə işlər davam etdirilir.
Laqodexi rayon rəhbərliyindən bildirilib ki, xüsusi komissiya dəymiş ziyanın qiymətləndirilməsini aparacaq, bundan sonra əhaliyə köməklik göstərilməsi üçün müvafiq tədbirlər görüləcək.
