Avstraliyanın Qantas Hava Yollarına məxsus Airbus A380 tipli sərnişin təyyarəsi Sidney-Yohannesburq reysində nasazlıq səbəbilə geri dönüb.
Sherg.az xarici mediaya istinadən xəbər verir ki, uçuşun başlanmasından qısa müddət sonra peyk rabitə sistemində yaranan problem təhlükəsizlik riskinə səbəb olub. Pilotlar təyyarəni havalandığı meydana qaytarmaq qərarı veriblər. Nəticədə, təyyarə 9 saat havada qaldıqdan sonra Sidneyə enib.
Şirkət sərnişinlərə hotellərdə yerləşmə imkanı yaradıb. Ertəsi gün həyata keçirilən yeni uçuşla sərnişinlər 14 saat 45 dəqiqəlik yolçuluqdan sonra Cənubi Afrikanın Yohannesburq şəhərinə çatdırılıb.
Oxşar hallar
İyun 2025-də Qantasın Perth - Paris reysi İran-İsrail arasında baş verən “12 günlük müharibə” səbəbilə Orta Şərq hava məkanının bağlanması ilə üzləşmişdi. Təyyarə 8 saatlıq uçuşdan sonra geri dönmüş, ümumilikdə 15 saat nəticəsiz yol getmişdi.
Aprel 2025-də Lufthansaya məxsus Los-Anceles-Münhen reysində sərnişinin planşeti oturacaqda sıxışdığı üçün təyyarə yanğın təhlükəsinə qarşı Boston şəhərinə yönləndirilib.
2024-cü ildə Skandinaviya Hava Yollarının Oslo -Malaqa uçuşunda yemək tepsisindən siçan çıxmış və təyyarə təhlükəsizlik səbəbindən Kopenhagendə məcburi eniş etmişdi.
Qeyd edək ki, mülki aviasiyada bəzən uçuşların ləğvi və ya geri dönüşü yalnız texniki nasazlıqlarla deyil, həm də müharibələr, heyvanların təyyarəyə düşməsi və ya kiçik elektron cihazların yaratdığı təhlükələrlə bağlı ola bilir.
