Avstraliyanın Melburn şəhərindəki hava limanında 50 yaşlarında olan bir sərnişinin cibindəki daşına bilən şarj cihazı (poverbank) həddindən artıq isinərək alovlanıb. Nəticədə sərnişinin ayaqlarında və barmaqlarında yanıq xəsarətləri yaranıb.
Sherg.az xəbər verir ki, Qantas Hava Yollarına məxsus xüsusi sərnişin zalında baş verən hadisə zamanı şarj cihazı qısa müddətdə alov topuna çevrilib. Zalın tüstü ilə dolmasının ardından təxminən 250 nəfər dərhal təxliyə edilib. Adı açıqlanmayan sərnişinə ilkin tibbi yardım hava limanı əməkdaşları tərəfindən göstərilib, daha sonra xəstəxanaya aparılan yaralı müalicədən sonra evə buraxılıb.
Qantas Hava Yollarının nümayəndəsi bildirib ki, hadisədən sonra xüsusi sərnişin zalı təmizlənərək təxminən 2 saat sonra yenidən istifadəyə açılıb. Şirkət hazırda daşına bilən şarj cihazları da daxil olmaqla litium batareyaların daşınması qaydalarını yenidən gözdən keçirir.
Bir çox hava yolu şirkəti də sərnişinlərə belə batareyaları baş üstü dolablarda deyil, əllərinin altında-oturacaq ciblərində və ya qarşıdakı oturacağın altındakı çantada saxlamağı tövsiyə edir.
Xatırladaq ki, iyul ayında Sidney-Hobart reysi zamanı da baş üstü dolabında yerləşən bir güc bankı yanğına səbəb olmuşdu.
Turan
