Oktyabrın 9-da Azərbaycan, Gürcüstan və Türkiyə müdafiə nazirləri arasında 12-ci üçtərəfli görüş keçirilib.
Sherg.az xəbər verir ki, bu barədə Müdafiə Nazirliyinin Mətbuat xidməti məlumat yayıb.
Bildirilib ki, Türkiyənin Ankara şəhərində keçirilən görüşdə xalqlarımız arasında mehriban qonşuluq və dostluq münasibətlərinin, qarşılıqlı əlaqələrin dövlət və hökumət başçılarımızın rəhbərliyi ilə daim inkişaf etdiyi diqqətə çatdırılıb.
Azərbaycan Respublikasının müdafiə naziri general-polkovnik Zakir Həsənov, Türkiyə Respublikasının milli müdafiə naziri cənab Yaşar Güler və Gürcüstanın müdafiə naziri cənab İrakli Çikovani regionda mövcud hərbi-siyasi vəziyyət, üçtərəfli formatda hərbi əməkdaşlığın inkişaf etdirilməsi, regional layihələrin təhlükəsizliyinin təmin olunması məsələlərini, eləcə də hərbi, hərbi-texniki, hərbi təhsil və hərbi tibb sahələrində əməkdaşlığın yeni perspektivlərini müzakirə ediblər.
Görüşdə müdafiə sahəsində üçtərəfli əməkdaşlığın bölgədə sülhün, sabitliyin və təhlükəsizliyin, davamlı inkişafın, eləcə də xalqlarımızın rifahının təmin olunması baxımından mühüm rol oynadığı xüsusi qeyd olunub.
Tərəflər, həmçinin ölkələrimiz arasında keçirilən üçtərəfli və ikitərəfli birgə təlimlərin vacibliyini vurğulayaraq hərbi əməkdaşlıq sahəsində qarşılıqlı maraq doğuran digər məsələlərə dair ətraflı fikir mübadiləsi aparıblar.
Üçtərəfli görüşün yekununa dair protokol imzalandıqdan sonra media nümayəndələri üçün mətbuat konfransı keçirilib.
***
Ankarada Azərbaycan, Türkiyə və Gürcüstan müdafiə nazirlərinin üçtərəfli görüşü keçirilib.
APA-nın yerli bürosu Gürcüstanın Müdafiə Nazirliyinə istinadla xəbər verir ki, nazirlər regionda təhlükəsizlik mühitini müzakirə ediblər.
Tərəflər bölgədə sülhə və konstruktiv əməkdaşlığa töhfə verən üçtərəfli əməkdaşlıq formatının əhəmiyyətini vurğulayıblar.
Nazirlər müdafiə sektorunda həyata keçirilən islahatlarla bağlı məlumat paylaşıblar.
Üçtərəfli görüş başa çatdıqdan sonra nazirlər birgə bəyannamə imzalayıblar.
Gürcüstanın müdafiə naziri İrakli Çikovani üçtərəfli əməkdaşlıq formatının üç ölkənin silahlı qüvvələrinin qarşılıqlı fəaliyyət qabiliyyətinin gücləndirilməsinə töhfə verdiyini bildirib. Bu xüsusda üçtərəfli təlimlərin dinamikası və hərbi təhsil sahəsində əməkdaşlıq vurğulanıb.
Qeyd edilib ki, müdafiə sahəsində üçtərəfli əməkdaşlıq regional təhlükəsizliyi gücləndirmək və müdafiə qüvvələri arasında sıx əlaqələr yaratmaq məqsədi daşıyır.
Gələn il müdafiə nazirlərinin üçtərəfli görüşünə Azərbaycan ev sahibliyi edəcək.
***
Ankarada Türkiyə, Azərbaycan və Gürcüstan müdafiə nazirlərinin üçtərəfli iclası keçirilir.
APA-nın Türkiyə bürosu xəbər verir ki, bu barədə Türkiyə Milli Müdafiə Nazirliyi məlumat yayıb.
Türkiyənin müdafiə naziri Yaşar Gülər əvvəlcə Azərbaycan müdafiə naziri general-polkovnik Zakir Həsənovla görüşüb.
O, daha sonra Gürcüstan müdafiə naziri İrakli Çixovani ilə də ikitərəfli görüş keçirəcək.
Görüşlərdə regional təhlükəsizlik, hərbi əməkdaşlıq və birgə təlimlərin keçirilməsi kimi məsələlərin müzakirə olunacağı gözlənilir.
