“NATO-nun Əlaqələndirici Səfirliyinin əsas vəzifəsi ev sahibi ölkə ilə sıx əməkdaşlıq şəraitində NATO-nun tərəfdaşlıq fəaliyyətlərini və ictimaiyyətlə əlaqə təşəbbüslərini dəstəkləməkdir”.
Bunu APA-ya eksklüziv müsahibəsində Slovakiya Respublikasının xarici və Avropa işləri üzrə naziri Yuray Blanar deyib.
“Məsələn, biz NATO qərargahından və Cənubi Qafqaz üzrə regional mandatı olan Gürcüstandakı NATO Nümayəndəliyindən bir neçə səfərin təşkilini asanlaşdırmışıq. Həmçinin, İsveçlə birlikdə Əlaqələndirici Səfirliklər olaraq universitet tələbələri və vətəndaş cəmiyyəti nümayəndələri üçün müxtəlif ictimai diplomatiya tədbirləri təşkil etmişik. Bu tədbirlərdə biz NATO–Azərbaycan əməkdaşlığı, eləcə də NATO-nun Mobil Təlim Qrupları tərəfindən Azərbaycanda həyata keçirilən fəaliyyətlər barədə məlumat paylaşmışıq”, - XİN rəhbəri vurğulayıb.
O qeyd edib ki, Azərbaycan NATO üzvlüyünə can atmasa da, Alyans üçün mühüm tərəfdaşdır: “Azərbaycan ISAF kimi əməliyyat missiyalarına praktiki töhfə verir və bu da NATO-nun regiondakı missiyasına düşən yükü azaldır.
Azərbaycan NATO standartlarına yaxınlaşmağa artan maraq göstərir və təhsil, potensialın artırılması, enerji təhlükəsizliyi, hibrid müharibəyə qarşı mübarizə, eləcə də elm sahəsində əməkdaşlıq daxil olmaqla geniş proqramlarla maraqlanır”.
Yuray Blanarın sözlərinə görə, Baş nazir Robert Fitsonun ötən il 7 may tarixində Azərbaycana səfəri zamanı imzalanan sazişlərdən sonra hərbi-texniki və müdafiə sahəsində əməkdaşlıq əhəmiyyətli dərəcədə güclənib: “Bu, yüksək rütbəli Slovakiya müdafiə rəsmilərinin, eləcə də işçi səviyyəli ekspert qruplarının Azərbaycana çoxsaylı səfərləri ilə özünü göstərir və öhdəliklərimizin praktiki şəkildə həyata keçirildiyini nümayiş etdirir”.
Xarici işlər nazirinin sözlərinə görə, Azərbaycan müəyyən silah sistemləri və hərbi texnikadan istifadə üzrə qiymətli praktiki təcrübəyə malikdir ki, bunlar Slovakiya Silahlı Qüvvələrinin arsenalının bir hissəsidir: “Bu isə təcrübə mübadiləsi, qabaqcıl praktikalara dair fikir paylaşımı və texniki biliklərin ötürülməsi üçün təbii imkanlar yaradır. Bundan əlavə, Azərbaycanın müdafiə sənayesi son illərdə nəzərəçarpacaq dərəcədə inkişaf edib və Slovakiya müəyyən sahələrdə satınalma üzrə əməkdaşlıq imkanları görür.
Slovakiya tarixi olaraq güclü müdafiə sənayesinə malikdir və yüksək texniki biliklərlə, istehsal imkanları ilə seçilir. Bu səbəbdən hər iki tərəfin dəyər qatdığı əməkdaşlığa qarşılıqlı və səmimi maraq mövcuddur. Bu qarşılıqlı yanaşma müdafiə tərəfdaşlığımızın balanslı və qarşılıqlı faydalı olmasını təmin edir, Azərbaycanın əməliyyat təcrübəsi və inkişaf edən müdafiə qabiliyyətlərini Slovakiyanın formalaşmış sənaye və texniki potensialı ilə birləşdirir.
Biz bu əməkdaşlığın gələcək dövrdə daha da inkişaf etdirilməsi üçün böyük potensial görürük. Buraya birgə layihələr və qarşılıqlı satınalma mexanizmləri üzrə imkanlar da daxildir”.
