Qlobal səviyyədə azalma bizdə məhsul qiymətlərinin aşağı düşəcəyi ehtimalını artırmır
Eldəniz Əmirov: Hazırda qiymətlərin ucuzlaşması yox, artmanın nisbətən dayanması mərhələsindəyik
Bu ilin sentyabr ayında ərzaq məhsullarının qlobal qiymət indeksi 128,8 bənd təşkil edib. Bu, ət və bitki yağlarının beynəlxalq qiymətlərinin artmasına baxmayaraq, avqust ayı ilə müqayisədə 0,6 faiz azdır.
Bu barədə Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) hesabatında bildirilir.
Taxıl, süd məhsulları, şəkər və bitki yağlarının qiymət indekslərinin aşağı düşməsi ətin bahalaşmasından yarana biləcək təzyiqi yumşaldıb.
Bununla belə qiymətlər indeksi 2024-cü ilin sentyabr ayı ilə müqayisədə 3,4 faiz yüksək olub.
İqtisadçı Eldəniz Əmirov Sherg.az-a deyib ki, əslində, bu göstəricilər qiymətlərin ucuzlaşması demək deyil:
"Fanon indeksi 2014–2016-cı illərin orta səviyyəsini 100 bənd kimi götürür. Yəni bugünkü 128 bənd həmin dövrə nisbətən ərzağın hələ də 29 faiz bahalaşdığını göstərir. Sadəcə, avqusta nisbətən 0,6 faizlik geriləmə var ki, bu da çox cüzi bir azalmadır. Buna görə də bu, qiymət artım tempinin zəifləməsidir, yəni ciddi bir azalma deyil. Belə azalmalar adətən davamlı olmur. Azərbaycanda isə vəziyyət bir qədər fərqlidir. Çünki bizim bazarlarda qiymətlər təkcə dünya qiymətlərindən asılı deyil. Düzdür, idxalın da rolu var, amma eyni zamanda daxili istehsal, daşınma xərcləri, məzənnə, idxal asılılığı və digər amillər də təsir göstərir. Buna görə də qlobal səviyyədə 0,6 faizlik azalma bizdə məhsul qiymətlərinin aşağı düşəcəyi ehtimalını artırmır. Biz hazırda qiymətlərin ucuzlaşması yox, artmanın nisbətən dayanması mərhələsindəyik. Ucuzlaşmanı gözləmək doğru olmazdı".
