Azərbaycan Mərkəzi Bankı (AMB) inflyasiya təzyiqləri fonunda ehtiyatlı pul siyasətini davam etdirəcək.
"APA-Economics" xəbər verir ki, bu barədə “Fitch Group”a daxil olan “Fitch Solutions” şirkətinin Azərbaycanla bağlı proqnozunda bildirilib.
Hesabata əsasən, AMB 2025-ci ilin qalan dövrü və 2026-cı ildə ehtiyatlı və məlumatlara əsaslanan pul siyasətini davam etdirəcək. Şirkətin fikrincə, Mərkəzi Bank inflyasiya təzyiqləri fonunda faiz dərəcələrini azaltmaqda tələsməyəcək, lakin iqtisadi artımın zəifləməsi və qiymət artımının sabitləşməsi halında mərhələli şəkildə yumşaldıcı siyasətə keçə bilər.
“Fitch Solutions” uçot dərəcəsini 2025-ci ildə 6,75%, 2026-cı ildə isə 6,25% səviyyəsində proqnozlaşdırıb. Bu, 2020–2024-cü illərdə müşahidə olunan orta göstəricilərdən bir qədər aşağıdır və qlobal neft qiymətlərinin azalması fonunda iqtisadi aktivliyin zəifləməsi ilə izah olunur.
Hesabata görə, qiymət təzyiqləri davamlı xarakter daşıyır və 2025-ci ilin sonuna qədər inflyasiyanın 6 faizə yüksələcəyi gözlənilir. Artım əsasən ərzaq məhsullarının bahalaşması və xidmət sektorundakı tarif tənzimləmələri ilə əlaqədardır. 2026-cı ildə isə bu təzyiqlərin müəyyən qədər azalacağı proqnozlaşdırılır.
Qeyd edilib ki, hazırda AMB-nin uçot dərəcəsi 7,00 faiz səviyyəsində saxlanılır. Mərkəzi Bank inflyasiyanın 2–6 faiz hədəf diapazonunu qorumaq üçün ehtiyatlı addımlar atır və qiymət sabitliyi tam bərpa olunmadan dərəcəni endirmək niyyətində deyil.
Xatırladaq ki, AMB 2024-cü ilin may ayından uçot dərəcəsini sabit saxlayıb və bu ilin iyul ayında ilk dəfə 0,25% bəndi endirib. AMB növbəti dəfə uçot dərəcəsi ilə bağlı qərarını bu ilin oktyabrın 22-də açıqlayacaq.
