Antalyanın Manavgat rayonunda yerləşən Doğançam məhəlləsində kiçikbaş heyvan yetişdiriciliyi ilə məşğul olan Mesut Şenə məxsus qoyunlardan biri 5 ayaqlı quzu dünyaya gətirib.
Sherg.az xəbər verir ki, Mesut Şen Anadolu Agentliyinə açıqlamasında bildirib ki, belə bir hadisə ilə ilk dəfə qarşılaşıb:
“Quzu digər quzulardan daha iri doğulub, amma ayağa qalxmaqda çətinlik çəkir. Sümükləri və oynaq quruluşu tamamilə normaldır, sadəcə hərəkət edə bilmir. Baytarlar da bu barədə dəqiq məlumat verə bilmədilər.”
Rayonda fəaliyyət göstərən baytar həkim Mehmet Yüksel isə bu cür doğuşların çox nadir hallarda baş verdiyini qeyd edib.
Onun sözlərinə görə, quzunun müayinəsi zamanı həyati funksiyalarına mane olacaq bir hal müşahidə olunmayıb:
“Belə anomaliyaların yaranmasına genetik faktorlar, sürü daxilində qohumluq əlaqələrinin çoxluğu, qidalanmada vitamin çatışmazlığı, hamiləliyin ilkin mərhələlərində baş verən infeksiyalar, bəzi dərman qalıqları və ya xarab yemdəki toksinlər səbəb ola bilər.”
