Bir millət, yeddi dövlət və bir media platforması
"Azərbaycan-Türkiyə Media Platforması 2021-ci ilin dekabr ayında İstanbulda qurulub. Platforma ilkin mərhələdə Türkiyə və Azərbaycan media subyektlərini əhatə etsə də, perspektivdə Qırğızıstan, Qazaxıstan, Özbəkistan media qurumlarının da buraya cəlb edilməsi potensialı baxımından Türk Dövlətlər Təşkilatının əsas strategiyasına çevrilib".
Bunu Sherg.az-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli deyib.
Ekspert bildirib ki, Media Platformasının qurulması TDT çərçivəsində vahid informasiya məkanının formalaşdırılması baxımından strateji əhəmiyyətə malikdir:
"Bu, bir tərəfdən qlobal miqyasda artmaqda olan dezinformasiya və saxta xəbərlə mübarizədə türk dövlətlərinin imkanlarını gücləndirir. Digər tərəfdən ortaq tarixi, mədəni və siyasi kimliyin təbliği üçün effektiv vasitəyə çevrilir. TDT-yə üzv dövlətlərin rəsmi və özəl media qurumları arasında əməkdaşlığın təmin edilməsi, informasiya axınının sürətləndirilməsi bu model üzrə xəbər gündəmin daha obyektiv təqdim edilməsinə şərait yaradır. Bununla yanaşı, müştərək təlimlər, seminarlar, konfranslar və forumların keçirilməsi eyni soydan olan yüzlərlə jurnalistə və media subyektinə ortaq təcrübə qazandırır. Statistik məlumatlara görə, son iki il ərzində TDT çərçivəsində 200-dən artıq media qurumu müştərək seminar, təlim, konfrans və forumlarda iştirak ediblər".
M.Ələsgərli vurğulayıb ki, nəticə etibarilə, TDT media platformasının qurulması və inkişaf etdirilməsi strateji informasiya təhlükəsizliyinin təmin edilməsi, milli dövlətlərin müdafiəsi, türk dünyasının beynəlxalq informasiya məkanında daha güclü təmsilçiliyi üçün əvəzsiz rol oynaya bilər: "Qlobal informasiya məkanında türk dövlətlərinin mövqeyinin gücləndirilməsinə yardım edər. Azərbaycan-Türkiyə media platforması bu kontekstdə çox gözəl nümunə yaradıb. Fikrimcə, Azərbaycan-Özbəkistan Media Forumunun keçirilməsi, onun çərçivəsində “Rəqəmsal dövrdə media tərəfdaşlığı: İnformasiya təhlükəsizliyi istiqamətində birgə təşəbbüslər” mövzusunun müzakirəyə çıxarılması yuxarıda təsvir etdiyim məqsədlərə xidmət edir. Bu, bir tərəfdən Azərbaycan və Özbəkistan media qurumlarının əməkdaşlıq imkanlarını, təcrübi bacarıqlarını artırırsa, digər tərəfdən ümumilikdə Türk Dövlətlər Təşkilatı platformasının imkanlarını genişləndirir".
