Azərbaycanda inflyasiya 2023-cü ilin I rübündən sonra azalmağa başlayıb.
Bu, Nazirlər Kabinetinin “Antiinflyasiya tədbirləri və onun iqtisadi nəticələrinə dair xüsusi bülleten”ində əksini tapıb.
Qeyd edilib ki, 2022-ci il fevralın 21-də Nazirlər Kabineti “Azərbaycan Respublikasında antiinflyasiya tədbirlərinin gücləndirilməsi ilə bağlı təxirəsalınmaz tədbirlər haqqında” Sərəncamı imzalayıb.
Görülmüş tədbirlərin nəticəsində artıq 2022-ci ilin doqquzuncu ayından başlayaraq orta illik inflyasiya sabitləşməyə başlayıb, orta aylıq inflyasiya isə sentyabrdan dekabra qədər 3.1%-dən 1%-ə qədər azalıb. 2022-ci ildə illik inflyasiya 14,4 faiz (2022-ci ilin dekabr ayı 2021-ci ilin dekabr ayına nəzərən), orta illik inflyasiya isə 13,9 faiz təşkil edib. Təhlillər göstərib ki, qiymət artımının birbaşa və dolayı olaraq əhəmiyyətli hissəsi xarici mənşəli xərc amilləri ilə bağlıdır: “İdxal üzrə illik qiymət indeksinin artımı 22,2% oldu ki, bu da dünya əmtəə qiymətlərinin və daşınma-logistika xərclərinin yüksəlməsi, habelə ticarət tərəfdaşı olan ölkələrdə inflyasiya templərinin artması (orta illik inflyasiya 20,4%) ilə izah edilirdi. Xüsusilə dünya ərzaq qiymətləri idxal vasitəsilə daxili ərzaq inflyasiyasına ciddi təsir göstərdi (2022-ci ilin dekabr ayında ölkəyə idxal edilmiş ərzaqlıq buğdanın 1 tonunun orta qiyməti 551,08 manat təşkil etmişdi). 2022-ci ilin son rübündə inflyasiyanın artım tempi dayandırıldı və sabitləşdi, enmə meylləri müşahidə olundu. Ancaq bununla belə, il ərzində ölkədə qiymətlərin bazar prinsipləri əsasında formalaşmasını qorumaqla inflyasiyanın işgüzar fəallığa və əhalinin sosial rifahına təsirlərini minimallaşdırmaq məqsədilə hökumət tərəfindən antiinflyasiya tədbirlərinin gücləndirilməsi istiqamətində tədbirlər davam etdirildi”.
Dövlət Statistika Komitəsinin məlumatına əsasən 2023-cü ilin sonunda 12 aylıq inflyasiya 2,1% təşkil etməklə hədəf (4±2%) diapazonunun aşağı hissəsində formalaşıb. 2023-cü ildə orta illik inflyasiya birrəqəmli səviyyədə 8,8% olub.
Tənzimlənən qiymətlərin, həmçinin mövsümi xarakterli məhsulların qiymət dəyişimi nəzərə alınmadan hesablanan baza inflyasiyasının tempi də azalaraq dekabrda 2,3% olmuş, inflyasiyanın bütün komponentləri üzrə azalma müşahidə edilmişdir. Ümumilikdə, 2023-cü ilin dekabrında illik inflyasiya ərzaq məhsulları üzrə 0,8%, qeyri-ərzaq məhsulları üzrə 2,7%, xidmətlər üzrə isə 3,7% təşkil edib.
