"İki il bundan qabaq oğlum İranda heç bir günahı olmadan şərlənib həbs olundu. O vaxtdan dövlət tərəfindən Fəridin azad olunması üçün işlər başlanıldı. Amma bu sadə məsələ deyildi, mən bunu anlayıram".
Bunu APA-ya açıqlamasında İrandan təhvil alınaraq Azərbaycana qaytarılan Fərid Səfərlinin anası Dilarə Əsgərova deyib.
Dilarə Əsgərova xatırladıb ki, hazırda İran həbsxanalarında əzab çəkən çoxlu ABŞ vətəndaşları var:
"Hansı ki, Amerika kimi dövlət onları azad edə bilmir. Yəni bu o qədər də sadə məsələ deyil, mən bunu anlayırdım. Amma ümidim var idi ki, Fərid azad olunacaq".
Dilarə Əsgərova qeyd edib ki, təxminən bir ay bundan öncə telefon danışığı zamanı Fərid həbsxana divarına onunla bağlı elan vurulduğunu deyib:
"SEPAH Fəridin fevralın 20-də azad olmasına icazə vermirdi. Fərid dedi ki, cəza müddətimi artıracaqlar. Sonra bir ana kimi səfirliklə danışdım. Məlum oldu ki, həqiqətən də Fəridin cəza müddətinin artırılması məsələsi gündəmdədi. İnanın ki, ruhən məhv olmuşdum. Fəridi bir də görəcəyimə ümidim demək olar ki, yox idi. Ona görə də oğluma telefon danışıqları zamanı səbr etməyi məsləhət görürdüm. İnanın ki, mənə Fəridin azad olunması xəbəri onun yenidən doğulması kimidir. O qədər xoşbəxt olmuşam ki. Bəlkə də mən doğulduğumdan bəri belə xoşbəxt olmamışdım. Bu xoşbəxtliyi mənə nəsib edən dövlət başçısı cənab İlham Əliyevə öz dərin təşəkkürümü bildirirəm. Bu işdə əməyi keçən Xarici İşlər Nazirliyinə, Dövlət Təhlükəsizlik Xidmətinə, ölkəmizin Tehrandakı səfirliyinə dərin təşəkkürümü bildirirəm. Bu məsələni ictimailəşdirib gündəmdə saxlayan media orqanlarına da dərin təşəkkürümü bildirirəm".
Qeyd edək ki, Almaniyanın Yena Universitetinin azərbaycanlı tələbəsi, 27 yaşlı Fərid Səfərli 2023-cü il fevralın 20-də eyni universitetdə təcrübə keçmiş həkim sevgilisini görmək üçün Tehran şəhərinə gedib.
F. Səfərli martın 5-də Almaniyaya qayıtmalı olsa da, geri qayıtmayıb. Martın 4-dən etibarən Fəridin telefonu sönüb, onunla əlaqə tamamilə itib.
Daha sonra ona İranın rəsmi qurumları tərəfindən casusluq ittihamı irəli sürüldüyü məlum olub.
19 iyul 2023-cü il tarixində keçirilmiş məhkəmə iclası zamanı Fərid Səfərliyə qarşı irəli sürülmüş “casusluq” ittihamı “casusluq etmək niyyəti” ittihamı ilə əvəz olunub. Məhkəmənin hökmü ilə o, 2 il yarım müddətinə azadlıqdan məhrum edilib.
Azərbaycan Respublikası Prezidentinin tapşırığına uyğun olaraq, Səfərli Fərid Qabil oğlu beynəlxalq hüquqi əməkdaşlıq və qarşılıqlı prosedur çərçivəsində yanvarın 18-də İrandan təhvil alınaraq ölkəmizə qaytarılıb.
