Babasil ildə təxminən 4 milyon müraciətlə ən çox rast gəlinən üçüncü həzm sistemi xəstəliyidir
ABŞ-də aparılan yeni tədqiqat göstərib ki, tualetdə uzun müddət oturmaqla bağlı ağıllı telefon istifadəsi babasil riskini əhəmiyyətli dərəcədə artırır.
Sherg.az xəbər verir ki, Boston şəhərindəki Beth Israel Deaconess Tibb Mərkəzində 2024-cü ilin avqust-dekabr ayları arasında aparılan araşdırmada 125 nəfər yetkinin vərdişləri öyrənilib. Onların 66 faizinin tualetdə telefon istifadə etdiyi müəyyən olunub və bu qrupda babasilə rast gəlmə ehtimalı digərlərinə nisbətən 46 faiz çox çıxıb.
Alimlər telefondan istifadə zamanı ən çox görülən fəaliyyətlərin xəbər oxumaq və sosial şəbəkələrdə vaxt keçirmək olduğunu bildiriblər. Tualetdə qalma müddətinin 5 dəqiqəni keçməməsi tövsiyə olunur. Mütəxəssislərin sözlərinə görə, babasil ildə təxminən 4 milyon müraciətlə ən çox rast gəlinən üçüncü həzm sistemi xəstəliyidir və səhiyyə sisteminə illik 800 milyon dollardan çox xərc gətirir.
Nəticə olaraq deyilir ki, günümüzdə adi hala çevrilmiş telefon istifadəsi tualetdə vaxtı uzadır və bu da babasil riskini artırır.
