Həkim etiraf edir ki, idarəetmədə boşluqlar var, xəstələrin narazılığı haqlıdır
Poliklinika və dövlət xəstəxanalarında həkim qəbuluna düşmək, tibbi arayış almaq (yerli poliklinika şöbələrində), USM, rentgen aparatında yoxlanmaq üçün günlərlə, saatlarla növbə gözləmək, hansısa həkim məzuniyyətdədir deyə xəstə qəbulunun dayandırılması, analizlərə görə vətəndaşların ayrı-ayrı klinikalara yönləndirilməsi, bir sözlə, “get-gəl”, süründürməçilik sosial şəbəkələrin əsas mövzusudur. Bu barədə ziyalılar, ictimai nüfuzu olanlar da yazır. Vəziyyət isə dəyişmir. Məsələ ilə bağlı həkim-terapevt Şahvələd Məmmədov Sherg.az-a açıqlamasında təşkilati işlərdə problemlər olduğunu inkar etmədi:
- İdarəetmə sistemində müəyyən boşluqlar olduğuna görə sistemin tətbiqində problemlər yaranır, poliklinika şöbələrinə müraciət edən insanlar əziyyət çəkir. Elektron resept, elektron bülleten sistemi tətbiq olunur. Amma müəyyən boşluqlar bu sistemdən faydalanmağı çətinləşdirir. Vətəndaş 1 saat vaxt itirir. Xəstəlik vərəqinin açılışında, yaxud bağlanması prosesi zamanı. Eləcə də həkim qəbuluna yazılma prosesində. Vətəndaşların narazılığı başadüşüləndir. Hesab edirəm ki, insanların məmnunluğu üçün bu ziddiyyətlər aradan qaldırılmalıdır. Ümid edək ki, mövcud boşluqlar yaxın gələcəkdə aradan qaldırılacaq.
