Zehni yorğunluq, diqqətin azalması və unutqanlıq çox vaxt gərgin iş tempi və stresslə izah edilsə də, müasir elmi tədqiqatlar bu halların qidalanma vərdişləri ilə birbaşa əlaqəli olduğunu göstərir.
Sherg.az xəbər verir ki, Qidalanma və Dietologiya üzrə türk mütəxəssis Zehra Elban qeyd edir ki, gündəlik həyatda “beyin sisi” kimi tanınan bu vəziyyət sadəcə keçici yorğunluq deyil, orqanizmin xüsusilə də beynin verdiyi mühüm siqnaldır.
Mütəxəssisin sözlərinə görə, ultra-emal olunmuş qidaların - rafinə karbohidratlar, əlavə şəkər, trans yağlar və yüksək omega-6 tərkibli məhsulların həddindən artıq qəbulu orqanizmdə iltihabi prosesləri gücləndirir. Bu proseslər insulin mexanizmini pozur və beyin toxumasında iltihablı reaksiyalara səbəb olur. Nəticədə diqqət dağınıqlığı, yaddaş zəifləməsi və düşünmə sürətinin azalması müşahidə edilə bilər. Araşdırmalar göstərir ki, bu cür qidalanma tərzi uzunmüddətli perspektivdə demans riskini də artıra bilər.
Beynin yüksək metabolik aktivliyə malik olması onu müəyyən mikroelementlərə xüsusilə həssas edir. B12 vitamini, fol turşusu, D vitamini, dəmir, maqnezium və omega-3 yağ turşularının çatışmazlığı bilişsel performansın aşağı düşməsi, unutqanlıq və zehni bulanıqlıqla əlaqələndirilir. Xüsusilə omega-3 yağ turşuları beyin hüceyrələrinin strukturunu qoruyur, iltihabı azaldır və düşüncənin daha aydın olmasına kömək edir.
Antioksidant baxımdan zəngin olan ispanaq və digər tünd yaşıl yarpaqlı tərəvəzlər, qırmızı və bənövşəyi meyvələr, sitruslar və zeytun yağı beyin hüceyrələrini oksidativ stresdən qoruyur. Klinik tədqiqatlar göstərir ki, ispanaqda olan lutein yaddaş və öyrənmə qabiliyyətinin yaxşılaşmasına müsbət təsir göstərir. Bundan əlavə, kifayət qədər su qəbulu da diqqət və zehni çeviklik üçün vacib amildir, çünki hətta yüngül susuzlaşma belə konsentrasiya və reaksiyanı zəiflədə bilər.
Nəticə etibarilə, düzgün və balanslı qidalanma yalnız fiziki sağlamlıq üçün deyil, həm də gündəlik zehni performansın qorunması üçün əsas şərtlərdən biridir. Antiinflamatuvar və antioksidant xüsusiyyətləri güclü olan sağlam qida modeli düşüncənin aydınlaşmasına, diqqətin artmasına və unutqanlığın azalmasına mühüm töhfə verir.
