Yararlılıq müddəti bitmiş dərmanların satışına görə cərimələr artırılır.
Bu, İnzibati Xətalar Məcəlləsinə təklif edilən dəyişiklikdə əksini tapıb.
Qanuna əsasən, bilə-bilə keyfiyyətsiz, normativ-texniki sənədlərin tələblərinə cavab verməyən, mənşəyi məlum olmayan, yararlılıq müddəti bitmiş, "Dərman vasitələri haqqında" Azərbaycan Respublikasının Qanununa uyğun olaraq dövlət qeydiyyatı tələb olunan, lakin dövlət qeydiyyatından keçməmiş dərman vasitələrinin satışı, satış məqsədi ilə saxlanması və ya idxalı, habelə saxta dərman vasitələrinin istehsalı, satışı, satış məqsədi ilə saxlanması və ya idxalı, bu əməllər az miqdarda törədildikdə inzibati xətanın bilavasitə obyekti olan dərman vasitələri müsadirə edilməklə vəzifəli şəxslər min beş yüz manatdan iki min manatadək məbləğdə, hüquqi şəxslər beş min manatdan yeddi min manatadək məbləğdə cərimə edilir.
Həmin xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə inzibati xətanın bilavasitə obyekti olan dərman vasitələri müsadirə edilməklə vəzifəli şəxslər iki min manatdan iki min beş yüz manatadək məbləğdə, hüquqi şəxslər yeddi min manatdan doqquz min manatadək məbləğdə cərimə edilir.
Layihəyə əsasən, nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə inzibati xətanın bilavasitə obyekti olan dərman vasitələri müsadirə edilməklə vəzifəli şəxslər iki min beş yüz manatdan üç min manatadək məbləğdə, hüquqi şəxslər doqquz min manatdan on bir min manatadək məbləğdə cərimə ediləcək.
Pediatr Vaqif Qarayev “Sherg.az”a açıqlamasında deyib ki, apteklərdə istifadə müddəti bitmiş dərmanlar ola bilər:
“Məncə, son vaxtlar istifadə müddəti bitmiş dərmanların aptekdə olması halları azalıb. Çünki insanlar aldığı dərmanın istifadə müddətinə özləri baxır. Əvvəl bu məsələ çox idi. Mənim də başıma gəlib. Düşünürəmki, aptek işçisi məsuliyyətli olduğu qədər alıcı da məsuliyyətli olmalıdır. Ümumiyyətlə istifadə müddəti keçmiş dərmanlar təsir gücünü itirə və ya zərərli təsirlər göstərə bilər. Buna görə belə dərmanları istifadə etməyin. Amma dərmanın rəsmi istifadə vaxtını dəyişmək məncə mümkün deyil. Əgər dəyişmək olursa bu artıq cinayət məsələsidir”.
