Son 15 gün ərzində Prezident İlham Əliyevin iştirak etdiyi dörd mühüm beynəlxalq zirvə toplantısı – BMT Baş Assambleyası, Danimarkada keçirilən Avropa Siyasi Birliyinin Zirvəsi, Qəbələdə baş tutan Türk Dövlətləri Təşkilatının iclası və Misirdə keçirilən Sülh Sammiti – dövlət başçımızın yüksək nüfuzunu və Azərbaycanın beynəlxalq aləmdə artan imicini bir daha nümayiş etdirdi. Cənab Prezidentin bu tədbirlərdə çıxışları, aparılan görüşlər və qlobal məsələlərə verdiyi rasional yanaşma həm onun şəxsən dünya liderləri arasında qazandığı hörmətin, həm də Azərbaycanın etibarlı tərəfdaş və sülhün təşəbbüskarı kimi tanınmasının bariz göstəricisidir. Bu iştiraklar Azərbaycanın qlobal proseslərdə artıq aktiv oyunçuya çevrildiyini, regional sabitlik və beynəlxalq əməkdaşlıq üçün zəruri mərkəz kimi qəbul edildiyini təsdiqləyir. Prezident İlham Əliyevin dünyada böyük nüfuzu, ona olan dərin hörmət, eyni zamanda dövlətimizin yüksələn imici və etibarlılığı Azərbaycanın diplomatik uğurlarının təməlini təşkil edir.
Beynəlxalq məsələlər üzrə mütəxəssis Əziz Əlibəyli Sherg.az-a bildirib ki, Azərbaycanın “yumşaq güc” adlanan diplomatiya imkanları və manevrləri onun iqtisadi, mədəni təzahürləri, eləcə də beynəlxalq sülh quruculuğundakı rolu əsasında formalaşan nəticələrə söykənir:
"Təbii ki, multikulturalist yanaşma nümayiş etdirməsi, Qoşulmama Hərəkatında fəal iştirakı, müasir neokolonializmə qarşı mübarizəsi və
sonradan BMT qətnamələrini əslində Azərbaycanın özünün icra etməsi və işğala son qoyulması prosesi yekunda bir nəticə doğurmalı idi. Bütün bunlar Azərbaycanın regionda oynadığı rolun məzmununa mühüm təsir göstərdi və ölkəmizi inkişaf etmiş regional gücə çevirdi. Son 15 gündə Prezident İlham Əliyev müxtəlif siyasi mərkəzlərdə və maraq təmsilçiləri ilə keçirdiyi görüşlərdə vahid Azərbaycan amilini ön plana çəkərək təmsil edə və tanıda bildi.
Azərbaycan brendi indi müxtəlif toqquşan tərəflər arasında yeganə lojistika, dialoq forması deməkdir. Üstəlik, dövlətimiz çox ümumi formada yox, konkret məsələlərə söykənir. Azərbaycan sülh quruculuğu istiqamətində dağılmış beynəlxalq nizamın yenidən formalaşmasında mühüm mərkəzdir.
Bütün bunlar qlobal proseslərdə dövlətin imicini, onun milli brendini ön plana çəkən, beynəlxalq miqyasda tanıdılması və möhkəmlənməsini reallaşdıran Prezident İlham Əliyev və birinci xanım Mehriban Əliyevanın həyata keçirdiyi siyasətin uğurlu göstəricisidir".
