Ermənistanın baş naziri Nikol Paşinyan parlamentdə çıxış edərək “Zəngəzur dəhlizi” mövzusuna yenidən qayıdıb.
Paşinyanın sözlərinə görə:
“Qoy Azərbaycanda nə istəsələr desinlər. Bundan sonra onlar neçə dəfə ‘Zəngəzur dəhlizi’ desələr də, bilin ki, bu, Ermənistanla bağlı deyil. Razılaşdırılmış ad TRIPP marşrutudur.”
Baş nazirin bu açıqlamasının videosu sosial şəbəkələrdə yayılıb və böyük rezonans doğurub.
Digər tərəfdən Ermənistan parlamentindəki müxalif “Ermənistan” fraksiyasının deputatı Artur Xaçaturyan deyib ki, “Zəngəzur dəhlizi” ifadəsini təkcə Azərbaycan Prezidenti İlham Əliyev yox, ABŞ Prezidenti Donald Tramp da işlədib”.
Ermənistan Baş naziri Nikol Paşinyan və ölkənin digər rəsmilərinin bu ifadəyə etirazlarına toxunan deputat bildirib:
“Dəhliz” sözünü təkcə Əliyev deyil, Tramp da işlədib. Tramp bunu söyləyəndə Paşinyan onun yanında oturmuşdu, qoy desin, bu necə dəhlizdir”.
Xatırladaq ki, avqustun 8-də Vaşinqtonda Azərbaycan, ABŞ və Ermənistan liderləri arasında üçtərəfli görüş keçirilib.
Cross Media Təhlil Mərkəzinin analitiki, siyasi şərhçi Mübariz Göyüşlü Sherg.az-a bildirib ki, Ermənistanın "Zəngəzur dəhlizi" ifadəsinə bu qədər kəskin, fobiya ilə yanaşması nəinki anlaşılan, heç qəbuledilən də deyil:
"Zəngəzur qədim Azərbaycan torpağıdır: o vaxt da belə olub, indi də belədir, bundan sonra da belə olacaq. Bunun adı Zəngəzur dəhlizidir. Ermənilər istəsələr də, istəməsələr də, narahat olsalar da, narazı qalsalar da, bu bir reallıqdır. Müxtəlif təqdimat formaları kimi məsələn, “Beynəlxalq tranzit dəhlizi” və ya başqa adlar altında səslənə bilər. Lakin reallıq birdir: bu ərazinin adı Zəngəzurdur, dəhlizin adı da Zəngəzur dəhlizidir. Necə ki, bir zamanlar ermənilər Qarabağın Azərbaycana məxsus olduğunu, azərbaycanlıların ora qayıdacağını qəbul etmirdilər. Lakin bunlar reallığa çevrildi. Xankəndi və ətrafındakı separatizmlə bağlı məsələlər artıq tarixə qovuşdu.
Eyni şəkildə Zəngəzur dəhlizi də açılacaq, istifadəyə veriləcək və məhz öz adı ilə fəaliyyət göstərəcək. Ermənilər isə bunu öz dövlətçiliklərinə təhdid kimi qiymətləndirirlər".
