Ermənistanın xarici işlər naziri Ararat Mirzoyanın Azərbaycan benzininin Ermənistan vətəndaşları üçün “çox sərfəli” olduğunu etiraf etməsi Cənubi Qafqazda formalaşan yeni geosiyasi və iqtisadi reallıqların açıq təzahürüdür. Bu açıqlama təkcə iqtisadi fakt deyil, eyni zamanda uzun illər inkar edilən regional həqiqətlərin siyasi səviyyədə qəbul edilməsi anlamına gəlir.
Uzun müddət Azərbaycanla bütün iqtisadi və ticarət əlaqələrini bloklayan Ermənistan artıq faktiki olaraq anlayır ki, regionda enerji, logistika və ticarət baxımından alternativsiz mərkəz ölkə Azərbaycandır. Azərbaycanın formalaşdırdığı dayanıqlı enerji infrastrukturu və rəqabətqabiliyyətli qiymət siyasəti Ermənistan cəmiyyətində real və artan tələbat yaradıb.
Mirzoyanın “psixoloji çətinliklər” ifadəsi isə Ermənistan daxilində Azərbaycana qarşı illərlə aparılmış düşmənçilik siyasətinin praktiki ehtiyaclar qarşısında tədricən aşınmağa başladığını göstərir. İqtisadi maraqlar siyasi mifləri arxa plana keçirir və reallıq ideologiyanı üstələyir.
Azərbaycan üçün bu proses yeni iqtisadi və siyasi təsir imkanları açır. Enerji və ticarət sahəsində mümkün əməkdaşlıq Bakıya regionda şərtləri müəyyən edən əsas tərəf kimi çıxış etmək imkanı verir, iqtisadi alətlər vasitəsilə sülh gündəliyini gücləndirir və Ermənistanı daha konstruktiv davranışa sövq edir.
Eyni zamanda, bu əməkdaşlıq formatında asimmetrik asılılıq formalaşır: ehtiyac duyan tərəf Ermənistan, imkan və resursları əlində cəmləyən tərəf isə Azərbaycandır. Bu vəziyyət Azərbaycanın milli maraqları baxımından strateji üstünlük deməkdir.
Nəticə etibarilə, Mirzoyanın açıqlaması bir daha göstərir ki, postmünaqişə dövründə regional liderlik artıq yalnız hərbi və siyasi güclə deyil, iqtisadi potensial və təsir rıçaqları üzərindən də təsdiqlənir. Azərbaycan bu prosesi tələsmədən, suveren maraqlarını qoruyaraq və oyunun qaydalarını özü müəyyən etməklə davam etdirməlidir.
