Ermənistan işğalçılıq planlarına görə peşman olacaq
“Təcavüzkar Ermənistanın cavabını layiqincə verəcəyik və düşmən öz təxribatlarına, işğalçılıq planlarına görə peşman olacaq”. Bu fikirləri “Şərq”ə Azərbaycan Demokrat Partiyasının sədri Sərdar Cəlaloğlu söyləyib.
Partiya rəhbəri bildirib ki, mülki şəxslərin atəşə məruz qalması, bir neçə şəhərimizin raketlə vurulması Ermənistanın dövlət kimi hərbi süqutunun əlamətidir:
“Düşmən çapalayır, siyasi isterikadadır və hara gəldi raket atır. Ermənilər dərk etmir ki, atdıqları addımlar özlərinin əleyhinədir.
Dinc əhalinin atəşə tutulması, cəbhə xəttindən xeyli uzaq şəhərlərə raket atılması Dağlıq Qarabağ münaqişəsi çərçivəsindən çıxır və Ermənistan-Azərbaycan müharibəsinə çevrilir.
Azərbaycanın tam hüququ yaranır ki, ərazimizə raket atan bütün atəş nöqtələrini məhv edək. Yerevanın yanındakı, eləcə də Gorusda və Dilicandakı hərbi hissələri vura bilərik. Buna haqqımız və gücümüz çatır.
Bundan sonra müharibə Ermənistan ərazisinə keçəcək. Heç kəs bu məsələdə Azərbaycanı qınaya bilməz. Çünki ilkin hücum məhz Ermənistan tərəfindən edilib.
Bizim bir mərmimiz belə Ermənistana düşməyib. Ordumuz işğal altındakı ərazilərimizdə hərbi əməliyyatlar həyata keçirir”.
