Dövlət çevrilişi ilə bağlı təkbaşına hərəkət mümkünsüzdür
Prezident Administrasiyasının sabiq rəhbəri Ramiz Mehdiyevin həbsi gündəmin əsas müzakirə mövzusudur. Ekspertlər hesab edirlər ki, R.Mehdiyevin ifşası vaxtilə Azərbaycanda hakimiyyət daxilində özünə yer edən, vəzifədən uzaqlaşdırılandan sonra da fəaliyyətlərini davam etdirən Rusiyanın casus şəbəkəsi və təsir qüvvələrinə qarşı mübarizə istiqamətində atılan həlledici addımdır. İddialara görə, Mehdiyevin xəyanət dosyesi Rusiya kəşfiyyatı tərəfindən təqdim olunub. Bəziləri hesab edirlər ki, Mehdiyevin uzun illər ərzində qurduğu siyasi şəbəkəyə qarşı əməliyyatın başlanğıcı ola bilər. Mehdiyevin yaxın çevrəsində olan bəzi şəxslərin də istintaqa cəlb olunacağı, adlarının çəkildiyi iddia edilir.
Ədalət Partiyasının sədri Mütəllim Rəhimov Sherg.az-a deyib ki, Ramiz Mehdiyev barəsində qaldırılan cinayət işinin, istintaqın yekununda bir çox məsələlərə aydınlıq gətiriləcək. Partiya rəhbərinin sözlərinə görə, R.Mehdiyevə elə maddələrlə ittihamlar irəli sürülüb ki, bu hərəkətləri tək bir adamın etməsi mümkün deyil:
"Xüsusilə, dövlət çevrilişi ilə bağlı təkbaşına hərəkət mümkünsüzdür. Düşünmürəm ki, Ramiz Mehdiyevin hərəkətləri ilə bağlı Azərbaycanın kənar informasiyaya ehtiyacı olsun. Ölkəmizdə son 20 ildən artıqdır ki, hər hansı bir ciddi təxribat müşahidə olunmur. Bu da dövlətin təhlükəsizlik qüvvələrinin uğurlu fəaliyyəti ilə bağlı olub. Ola bilməz ki, dövlətin müvafiq qurumu bir addımlığında olan məmurların hərəkətlərindən xəbərsiz olsun. Dövlət idarəetməsi elə bir mürəkkəb quruluşa malikdir ki, nəyin nə zaman ediləcəyinin özünün böyük fəlsəfi anlamı olur. Dövlət davakar, əsəbi uşağa bənzəməz. O, hər şeyin zamanını çox sakit halda səbirlə gözləyir, hərəkətə keçdikdə isə mütləq nəticə əldə edir. Təbii ki, bu, ciddi və ənənəyə sahib dövlətlərə aiddir. Buradan çıxış edərək deyə bilərik ki, zamanı yetişdiyindən R.Mehdiyevin cinayətləri ilə bağlı hərəkətə keçilib".
