Moskva Avropa İnsan Haqları Məhkəməsinin (AİHM) 2008-ci il hadisələri ilə bağlı Gürcüstana 253 milyon avro ödəməyə dair qərarını yerinə yetirməyi planlaşdırmır. Kremlin mətbuat katibi Dmitri Peskov açıq şəkildə qərarı yerinə yetirməyəcəklərini bildirib.
Qeyd edək ki, dünən Avropa İnsan Haqları Məhkəməsi (AİHM) Rusiyanın 2008-ci ildəki hərbi münaqişə ilə bağlı Gürcüstana 253 milyon avro ödəməsi ilə bağlı qərar qəbul edib.
Milli Cəbhə Partiyasının sədr müavini Məhəmməd Əsədullazadə Sherg.az-a açıqlamasında bildirib ki, Rusiyanın Qərbin qəbul etdiyi qərarları icra etməməsi artıq yeni bir hal deyil, bu, Moskvanın uzun illərdir davam etdirdiyi siyasətin tərkib hissəsidir:
“Qərb və Rusiya arasında bu gün həm geosiyasi, həm də hərbi qarşıdurma müşahidə olunur. Ukrayna müharibəsi ilə bu toqquşma daha da dərinləşib. Qərb Rusiyanı siyasi, iqtisadi və diplomatik cəhətdən bloklayıb, geniş sanksiyalar tətbiq edib, Avropa banklarındakı maliyyə hesablarını dondurub. Belə bir şəraitdə AİHM-nin qərarını Rusiyanın icra etməsi, əlbəttə ki, real görünmür. Rusiya son illərdə beynəlxalq hüququ sistematik şəkildə pozur və bu prinsipləri faktiki olaraq heçə sayır. Rusiya bu qərarların öz suverenliyinə müdaxilə kimi təqdim edir və Qərb təsisatlarının legitimliyini şübhə altına alır.
AİHM-nin Gürcüstanla bağlı qərarı da eyni prinsipial yanaşmanın bir nümunəsidir. Kreml bu qərarları siyasi motivli, Qərbin Rusiyaya təzyiq aləti kimi qiymətləndirir. Əslində isə bu, beynəlxalq hüququn və ədalətin qorunması istiqamətində atılmış addımdır. Ancaq Moskva artıq bu cür qərarların icrasından imtina etməklə, özünü beynəlxalq hüquq sistemindən kənarda saxlayır. Bu da onun həm reputasiyasına, həm də gələcəkdə beynəlxalq məhkəmələrlə əməkdaşlığına ciddi zərbə vurur”.
Siyasi ekspertin sözlərinə görə, son nəticədə Rusiyanın beynəlxalq hüquqa qarşı bu etinasız mövqeyi onu getdikcə daha çox təcrid vəziyyətinə salır:
“Qərb institutlarının qərarlarını qəbul etməmək Moskvanı yalnız qısa müddətdə daxili auditoriya qarşısında “güclü dövlət” kimi göstərir, lakin uzunmüddətli perspektivdə bu, həm siyasi, həm də iqtisadi baxımdan ağır nəticələrə səbəb olur”.
