“Hər hansı bir funksiyası qalmayıb”
“Fransa heç vaxt Minsk qrupunun həmsədr ölkəsi kimi obyektiv mövqe sərgiləməyib”
“Ona görə də Fransanın Minsk qrupunun həmsədrliyində qalması düzgün deyil”
Fransanın Azərbaycandakı Səfiri Zakari Qros Xarici İşlər Nazirliyinə çağırılıb. Görüşdə Fransa Senatı tərəfindən qondarma rejimin tanınmasına dair qətnamənin qəbul edilməsi ilə əlaqədar Azərbaycan XİN-in etiraz notası səfirə təqdim edilib. Senatın bu qətnaməsi ilə bağlı qəti etiraz Fransa səfirinin diqqətinə çatdırılıb. Fransa səfiri Azərbaycan XİN-in mövqeyinin Parisin diqqətinə çatdırılacağını bildirib. Məhz bu görüşdən sonra Fransa XİN-in brifinqi keçirilib. Brifinq zamanı qeyd olunub ki, rəsmi Paris “Dağlıq Qarabağ Respublikası”nın müstəqilliyini tanımır:
“25 noyabrda Senat qətnamə qəbul edib və bu qətnamədə öz müstəqilliyini elan etmiş “Dağlıq Qarabağ Respublikası”nın tanınması ilə bağlı Fransa hakimiyyətinə çağırış edilib. Səsvermədən əvvəlki müzakirələr zamanı Xarici İşlər Nazirliyinin Dövlət katibi Jan-Batist Lemuan Fransa hökumətinin bu mövzuda mövqeyini bir daha xatırladıb – Fransa özünü müstəqil elan etmiş “Dağlıq Qarabağ Respublikası”nı tanımır”.
Fransa XİN-nin bəyanatını “Sherg.az”a şərh edən millət vəkili Məlahət İbrahimqızı bildirib ki, nazirliyin qondarma rejimin müstəqilliyini təsdiq etməməsi yaxşı haldır. Lakin Fransa istənilən halda ermənipərəst mövqeyindən əl çəkə bilməyəcək:
“Fransa heç vaxt Minsk qrupunun həmsədr ölkəsi kimi obyektiv mövqe sərgiləməyib. Ona görə də Fransanın Minsk qrupunun həmsədrliyində qalması düzgün deyil. Ümumiyyətlə, Minsk qrupunun hər hansı bir funksiyası qalmayıb, bir sözlə, “kitabı bağlanıb””.
Xanım parlamentari qeyd edib ki, Fransa prezidenti də artıq Azərbaycanın ərazi bütövlüyünü tanıyır:
“Bu yaxınlarda Makronun sosial şəbəkədə açıqlamasının da şahidi olduq. Onsuz da bütün tarixi mənbələr Qarabağın Azərbaycan ərazisi olduğunu sübut edib. Bu baxımdan Fransa hakimiyyəti qondarma rejimi tanımadığını rəsmi şəkildə bəyan edir”.
