Qərb ölkələrinin bəzi liderləri ukraynalılardan ucuz işçi qüvvəsi kimi istifadə edir, Kiyev hakimiyyətindən isə işsiz qaçqınların Ukraynaya qaytarılmasını tələb edirlər. Bunu Ukrayna Prezidenti Volodimir Zelenski “Rada” telekanalının efirində bildirib.
Dövlət başçısı vurğulayıb ki, mən onlara deyirəm ki, gəlin bu barədə mətbuat konfransında danışaq, heç biri bunu istəmir. Çünki onların cəmiyyətləri bütün bunlara fərqli yanaşır. Onlar pullarını sayırlar, xaricdəki ukraynalıları dəstəkləmək üçün ildə nə qədər pul xərclədiklərini sayırlar. Orada işləməyən ukraynalılar haqqında isə deyirlər ki, onları ölkənizə qaytarın.
Politoloq Sultan Zahidov “Sherg.az”a söyləyib ki, 2022-ci ilin fevralında Rusiya Ukraynanı işğal etdikdən sonra rəsmi Kiyevdən milyonlarla qaçqın Avropanın müxtəlif şəhərlərinə, o cümlədən Polşa, Ruminiya və Almaniyaya səpələndilər:
“Hazırda da Avropada milyonlarla qaçqın yer almaqdadır. Ukraynalılar daxili rəqabətə tab gətirə bilmək üçün özlərini ucuz işçi qüvvəsi kimi təqdim etməli olmuşdular. Bundan isə bəzi Avropa şirkətləri sui-istifadə etdi və ukraynalıları ucuz işçi qüvvəsi olaraq işə cəlb etməyə başladılar. Bu isə Ukrayna daxilində müəyyən gərginlik yaratdı və yerli işçilər bundan narazı olmağa başladılar. Qaçqınların peyda olmasına səbəb isə təbii ki, Rusiyanın işğalçı savaşa başlaması idi. Burada Ukraynanın edəcəyi heç nə yoxdur və həmin şəxsləri məcburi şəkildə geri qaytara bilməzlər. Qaçqınların geri dönməsi üçün müəyyən sabitlik yaranmalıdır. Eyni zamanda Avropa şirkətləri də ucuz içki qüvvəsi kimi ukraynalıları istifadə etməkdə maraqlı olmamalıdırlar. Ümumiyyətlə, Ukrayna ilə Avropa arasında qaçqınlar məsələsində ciddi fikir ayrılıqları mövcuddur”.
