Belə hallarda azyaşlı valideynindən və ya onu avaralığa cəlb edən yetkin şəxsdən alınaraq, müvafiq qaydada uşaq evinə yerləşdirilə bilər
Azyaşlını zorla dilənçiliyə sövq edən şəxs həbs edilib.
DİN-in İnsan Alverinə Qarşı Mübarizə Baş İdarəsinin əməkdaşları tərəfindən daxil olan əməliyyat məlumatı əsasında keçirilən tədbir nəticəsində İlqar Ələsgərov yetkinlik yaşına çatmayan bir nəfəri məcburi əməyə cəlb etməkdə şübhəli bilindiyi üçün saxlanılıb.
Araşdırmalarla onun zərərçəkəni paytaxtın müxtəlif ərazilərində avaraçılıq və dilənçiliyə sövq etməklə maddi gəlir əldə etdiyi sübuta yetirilib.
Faktla bağlı Baş İdarədə Cinayət Məcəlləsinin yetkinlik yaşına çatmayan şəxsi məcburi əməyə cəlb etmə maddəsi ilə başlanılan cinayət işi üzrə istintaq yekunlaşaraq baxılması üçün məhkəməyə göndərilib. İ.Ələsgərov Cinayət Məcəlləsinin qeyd olunan maddəsi ilə təqsirli bilinərək 7 il 6 ay müddətinə azadlıqdan məhrum edilib.
Mövzu ilə bağlı “Sherg”az-a danışan hüquqşünas Ramil Süleymanov bildirib ki, qanunvericilikdə “dilənçilik” anlayışı mövcud deyil:
“Bu fəaliyyət hüquqi baxımdan “avaralıqla məşğul olmaq” termini altında tənzimlənir. Azərbaycan Respublikasının İnzibati Xətalar Məcəlləsinin 523.2-ci maddəsinə əsasən, yetkinlik yaşına çatmayan şəxsin yetkin yaşına çatmış şəxs tərəfindən avaralığa cəlb edilməsi həmin şəxsin 50 manatdan 90 manata qədər məbləğdə cərimələnməsi və ya işin hallarından, eləcə də xətanı törədən şəxsin şəxsiyyətindən asılı olaraq 5 gündən 15 günədək inzibati həbs ilə cəzalandırılması ilə nəticələnir. Bununla yanaşı, azyaşlının diləndirilməsi faktı mütəmadi xarakter daşıdığı və dövlət qurumları tərəfindən davamlı şəkildə müşahidə olunduğu təqdirdə, müvafiq icra hakimiyyəti orqanı tərəfindən qanunvericiliyə uyğun tədbirlər görülür. Belə hallarda azyaşlı valideynindən və ya onu avaralığa cəlb edən yetkin şəxsdən alınaraq, müvafiq qaydada uşaq evinə yerləşdirilə bilər”.
