15 may 2025-ci il tarixində İsveçrənin Bazel şəhərində keçirilən “Eurovision 2025” mahnı müsabiqəsinin ikinci yarımfinalında azərbaycanlı müğənni Samira Efendi (səhnə adı ilə Efendi) qonaq ifaçı kimi səhnəyə çıxacaq.
Sherg.az xəbər verir ki, Efendinin çıxışı 2020-ci ildə pandemiya səbəbindən “Eurovision”un ləğv olunması nəticəsində səhnəyə çıxmaq fürsəti əldə edə bilməyən sənətçilər üçün təşkil olunmuş xüsusi “interval aktı” çərçivəsində baş tutacaq.
Bu aktda müxtəlif illərin sevilən sənətçiləri bir araya gəlib tamaşaçılara nostalji dolu anlar yaşadacaq.
Qeyd edək ki, Efendi 2020-ci ildə “Cleopatra” mahnısı ilə Azərbaycanı təmsil etməli idi, lakin həmin il müsabiqə baş tutmadı. O, 2021-ci ildə isə “Mata Hari” adlı mahnı ilə çıxış edərək finalda 20-ci yeri tutmuşdu. Onun enerjili çıxışı və vizual şousu hələ də Eurovision fanatlarının yaddaşındadır.
Bu gecəki ikinci yarımfinal Bakı vaxtı ilə saat 23:00-da başlayacaq. Efendinin səhnə çıxışı isə müsabiqənin interval aktı zamanı yayımlanacaq.
Elmar İbrahimli
