Kiyev amerikalı aktrisa Ancelina Colinin Ukraynaya səfəri zamanı onu müşayiət edən qrupa daxil olan şəxslərdən birinin Mikolayiv vilayətində hərbi komissarlığa aparılmasının səbəb və şəraitini araşdırır.
Teleqraf xəbər verir ki, bu barədə “Politico” yüksək rütbəli ukraynalı rəsmiyə istinadla məlumat verib.
Mənbənin sözlərinə görə, hökumət Colinin mühafizəçisi ilə nə baş verdiyini hələ də dəqiq anlamağa çalışır. Rəsmilər əlavə ediblər ki, aktrisa Ukrayna hökumətini ölkəyə səfəri barədə əvvəlcədən xəbərdar etməyib.
Ukrayna hərbi mənbələri sosial mediada əvvəlcə hərbi komissarlığa aparılan şəxsin Colinin sürücüsü olduğunu yazmış, sonra həmin paylaşımı silmişdi. “Politico”nun məlumatına görə, hərbçilər bu xəbəri nə təsdiqləyir, nə də təkzib edir. Mikolayiv hərbi komissarlığı isə ilkin məlumatı təsdiqləyərək bildirib ki, aktrisanın sürücüsü ehtiyatda olan hərbçidir və hərbi toplanışa çağırış əmri alıb.
Noyabrın 5-də Ancelina Coli Xerson şəhərinə gəlib. Daha sonra yerli KİV yazıb ki, şəhərə girişdəki postda onun mühafizəçilərindən biri hərbi komissarlığın əməkdaşları tərəfindən gecə saxlanılıb. Məlumata görə, Coli şəxsən hərbi komissarlığa gedərək mühafizəçisinin sərbəst buraxılmasına nail olub. İddiaya görə, mühafizəçi uzun müddət orada saxlanılıb, bundan sonra Prezident Volodimir Zelenskinin ofisinə zənglər edilib.
