Türkiyənin Daxili İşlər Nazirliyi tərəfindən Şanlıurfa və Kahramanmaraşdakı məktəblərdə baş verən hücumlardan sonra ölkənin 81 vilayətində bütün təhsil müəssisələrində təhlükəsizlik tədbirləri gücləndirilib.
Sherg.az xəbər verir ki, daxili işlər naziri Mustafa Çiftçi və Milli Təhsil naziri Yusuf Tekinin iştirakı ilə başlayan onlayn toplantıda məktəblərdə və onların ətrafında görüləcək tədbirlər müzakirə edilib. Toplantıda həmçinin Daxili İşlər nazirinin müavinləri Kübra Güran Yiğitbaşı və Ali Çelik, Polis Baş İdarəsinin rəisi Mahmut Demirtaş və Jandarma Baş Komandanı ordu generalı Ali Çardakcı da iştirak ediblər. Görüşdə məktəblərdə və onların ətrafında görüləcək təhlükəsizlik tədbirləri dəyərləndirilib.
Ölkə üzrə məktəblərdə təhlükəsizlik tədbirləri artırılıb
Nazirliyin göstərişi ilə sürətlə tətbiq edilən tədbirlər çərçivəsində məktəb qarşılarında və ətrafında növbədə olan polis qrupları tərəfindən genişmiqyaslı yoxlamalar həyata keçirilib.
Paytaxt Ankarada Polis İdarəsinin qrupları, xüsusilə ibtidai, orta və lisey məktəbləri başda olmaqla, məktəb ətrafında xidmət apararaq şübhəli şəxslərə qarşı Ümumi Məlumat Toplama (GBT) və vəziyyət yoxlamaları həyata keçirib.
Müvafiq qurumlarla koordinasiyalı şəkildə aparılan işlərdə məktəb önlərində ən azı iki polis əməkdaşının vəzifələndirildiyi, tədris saatları ərzində müəllim və şagirdlərin təhlükəsizliyi üçün lazım olduqda əlavə qüvvələrin də prosesə cəlb ediləcəyi bildirilib.
Qeyd olunub ki, bu tədbirlər ölkə üzrə aparılan risk təhlilləri və qiymətləndirmələrə əsasən müəyyən ediləcək strategiyalar çərçivəsində fasiləsiz davam etdiriləcək.
Digər tərəfdən, İstanbulda bəzi məktəb ətraflarında da polis tərəfindən yoxlamalar aparılıb. Qruplar nəqliyyat vasitələrini yoxlayıb, sürücülərə və məktəb ətrafındakı şübhəli şəxslərə qarşı GBT nəzarəti həyata keçirib.
Baş verən hadisələrdən sonra yeni təhlükəsizlik tədbirlərinin görülməsi ehtimalının da yüksək olduğu bildirilir. Bəs məktəb hücumlarının tez-tez yaşandığı ABŞ-də vəziyyət necədir?
ABŞ-də məktəb təhlükəsizliyi
ABŞ-də aparılan genişmiqyaslı məktəb təhlükəsizliyi araşdırması, son 10 ildə təhsil müəssisələrinin gördüyü tədbirlərdə ciddi dəyişiklikləri ortaya qoyub. Məktəb Cinayət və Təhlükəsizlik Sorğusu (SSOCS) məlumatlarına görə, məktəblər daha çox texnoloji nəzarət sistemlərinə yönəlib, metal detektorları və uniforma kimi tətbiqlər isə arxa planda qalıb.
2021–2022 tədris ilini əhatə edən son məlumatlara əsasən, məktəblər artıq şagird davranışlarını məhdudlaşdırmaqdan çox, texnologiya və giriş nəzarətinə fokuslanır. Sorğuda iştirak edən dövlət məktəblərinin rəhbərlərinə görə, ən geniş yayılmış təhlükəsizlik tədbirləri ziyarətçi nəzarəti və texnoloji izləmə sistemləridir. Məktəblərin 97 faizi dərs saatlarında girişləri tam nəzarətdə saxlayır, həmçinin 97 faizi ziyarətçilərin qeydiyyatdan keçməsini və tanıtım nişanı taxmasını tələb edir.
Texnoloji nəzarət sistemlərində artım da diqqət çəkir. 2009–2010-cu illərdə məktəblərin 61 faizində olan təhlükəsizlik kameraları bu gün 93 faizə yüksəlib. Bundan əlavə, anonim təhlükə bildiriş sistemlərinə malik məktəblərin sayı da 36 faizdən 62 faizə qalxıb.
Ən az tətbiq olunan tədbir: metal detektorlar
Gözlənildiyinin əksinə olaraq, ABŞ məktəblərində metal detektorları ən az istifadə edilən təhlükəsizlik vasitələrindən biri olaraq qalır.
Şagirdlərin hər gün metal detektorundan keçirilməsi: 2%
Şəffaf məktəb çantası tətbiqi: 4%
Məktəb növlərinə görə fərqlər
Təhlükəsizlik tədbirləri məktəbin səviyyəsinə görə dəyişir:
İbtidai məktəblər: giriş nəzarəti və işçilərin şəxsiyyət kartı daşıması kimi tədbirlərə daha çox diqqət yetirilir.
Liseylər: kamera nəzarəti, təsadüfi yoxlamalar və metal detektorlarının istifadəsi daha yüksək səviyyədədir.
Mütəxəssislər bildirirlər ki, sorğunun rəqəmsallaşdırılması və məlumat toplama metodlarının modernləşdirilməsi məktəblərdə real təhlükəsizlik mənzərəsini daha aydın şəkildə ortaya çıxarıb.
