Prezidentin köməkçisi – Prezident Administrasiyasının (PA) İqtisadi məsələlər və innovativ inkişaf siyasəti şöbəsinin müdiri Şahmar Mövsümov Nazirlər Kabineti yanında Operativ Qərargahın avqustun 20-də keçirilən brifinqində sentyabrın 15-dən dərslərin bərpa olunması nəzərdə tutulduğunu deyib. Onun sözlərinə görə, valideynlərin vaksinasiya olunması ilə bağlı hər hansı bir tələb yoxdur. “Ancaq təhsil işçilərinin 80 faizinin peyvənd olunması ilə bağlı tələb var”. – deyə, Şahmar Mövsümov bildirib.
Bu barədə “Sherg.az”a danışan təhsil eksperti Kamran Əsədov hesab edir ki, dərslərin ənənəvi qayda bərpa edilməlidir:
“Bu, qaçılmazdır. İl yarımdan çox dərslər distant keçirildi. Və həmin dönəmdə tədrisin keyfiyyətindən söhbət gedə bilməzdi. İndi vətəndaşların xeyli hissəsi vaksinləşib. Üstəgəl, davranış qaydalarını da mənimsəmişik. Onu da nəzərə almaq lazımdır ki, 4447 orta ümumtəhsil məktəbində şagirdlərin heç də hamısının texniki imkanları yoxdur. Bütün bunlar yeni tədris ilindən etibarən orta və ali məktəblərdə dərslərin ənənəvi formada başlanmasını zəruri edir. Əlbəttə, mövcud pandemiya qaydalarına əməl etmək o cümlədən, sosial məsafəni qorumaq, tibbi maska taxmaq şərti ilə”.
