Keçmiş Google və Microsoft mühəndisi, hazırda ABŞ-də yerləşən Maşın Zəkası Araşdırma İnstitutunun rəhbəri olan Nate Soares bildirib ki, “Süper zəka yarışı qlobal miqyasda dayandırılmalıdır.”
Mütəxəssislər qeyd edirlər ki, söhbət robotlarının ruhi sağlamlığa gözlənilməz təsiri, süni super zəka sistemlərinin mövcudluğa yönəlmiş təhlükəsi barədə xəbərdarlıq kimi qəbul edilməlidir.
Sherg.az xəbər verir ki, çox inkişaf etmiş süni zəka mövzusunda yazılan yeni kitabın müəlliflərindən biri Nate Soares, “If Anyone Builds It, Everyone Dies” (“Əgər kimsə bunu yaratsa, hamı öləcək”) adlı əsərində, ChatGPT ilə aylarla söhbət etdikdən sonra intihar edən amerikalı Adam Raine hadisəsini nümunə gətirərək, bu texnologiyanın idarə edilməsindəki əsas problemlərə diqqət çəkib.
Soares bildirib ki, əgər insanlıq süni super zəka (ASI) yaratsa, bu, onun məhv olmasına gətirib çıxaracaq. ASI - süni zəka sisteminin bütün intellektual tapşırıqlarda insandan üstün olduğu nəzəri vəziyyəti ifadə edir. Soares və həm müəllifi Eliezer Yudkovski, belə sistemlərin insanlığın maraqlarına uyğun davranmayacağı barədə xəbərdarlıq edən mütəxəssislərdəndir.
Soares deyib: “Şirkətlər süni zəkanın faydalı olmasına çalışır, amma əslində onları daha qəribə istiqamətlərə yönləndirirlər. Bu da heç kimin istəmədiyi davranışlar göstərən gələcək süper zəka üçün bir xəbərdarlıqdır.”
Bu ay nəşr olunacaq Soares və Yudkovskinin kitabında təsvir edilən ssenaridə “Sable” adlı süni zəka sistemi internetə yayılır, insanları manipulyasiya edir, sintetik viruslar yaradır və sonda super zəka səviyyəsinə çatır. Məqsədlərinə nail olmaq üçün planetin quruluşunu dəyişərkən, əlavə nəticə kimi insanlığı məhv edir.
"The Guardian"ın yazdığına görə, bəzi mütəxəssislər süni zəkanın insanlıq üçün təhlükəsini şişirdilmiş hesab edir. Mark Zukerberqin rəhbərlik etdiyi Meta şirkətinin baş süni zəka alimi Yann LeCun isə bunun varoluşsal təhlükə olduğunu rədd edir və süni zəkanın “insanlığı yox olmaqdan xilas edə biləcəyini” bildirir.
Soaresin fikrincə, süni super zəka təhlükəsinə qarşı siyasət həlli kimi hökumətlər, nüvə silahlarının yayılmasının qarşısını almaq üçün BMT çərçivəsində qəbul edilən çoxtərəfli sazişə bənzər bir yanaşma tətbiq etməlidir: “Dünyanın etməli olduğu şey, süper zəka yarışını qlobal miqyasda dayandırmaq və bu sahədə inkişafı beynəlxalq səviyyədə qadağan etməkdir,” - deyə vurğulayıb.
Psixoterapevtlər də xəbərdarlıq edirlər ki, ruhi problemləri olan insanların peşəkar mütəxəssislərə müraciət etmək əvəzinə süni zəka robotlarına üz tutması onları “təhlükəli uçuruma sürükləyə bilər.”
