"Avropa Parlamenti Azərbaycan hökumətini "Dağlıq Qarabağ"da erməni mədəni irsini məhv etməkdə, inkar etməkdə ittiham edən qətnamə qəbul edib".
"Sherg.az" xəbər verir ki, bu barədə Böyük Azərbaycan Partiyasının sədri Elşad Musayev deyib.
Partiya rəhbəri bildirib ki, bu məkrli, ermənipərəst və ədalətsiz qətnamənin lehinə 635, əleyhinə 2 nəfər səs verib, 42 nəfər isə bitərəf qalıb:
"İllərlə yön götürdüyümüz Qərbin, Avropanın, Avropa İttifaqının növbəti ikiüzlü, riyakar və qərəzli mövqeyi ilə üzləşməli oluruq. Elə bir zamanda ki, həm ədalət Azərbaycanın tərəfindədir, həm də Rusiyanın qaz asılılığında çabalayan Avropanın Ermənistana yox, məhz Azərbaycana, onun enerji resurslarına və enerji xətlərinə ehtiyacı var.
Avropanı anladıq. Bəs bizim Avropa ölkələrindəki səfirlərimiz, səfirlik əməkdaşları nə işlə məşğuldurlar. Təsəvvür edirsiniz, Azərbaycan əleyhinə qətnamənin lehinə 635, əleyhinə isə cəmi 2 nəfər səs verir. Fikrimcə, Avropadakı Azərbaycan səfirlərini dərhal geri çağrılmalı, səfirliklərdə ciddi yoxlamalar aparılmalıdır. Azərbaycan Milli Məclisinin ayrı-ayrı ölkələrlə parlamentlərarası dostluq qrupları və onların rəhbərləri var. Xarici ölkələr və onların müvafiq qurumları ilə işləyən təşkilatların və rəhbərlərinin gördüyü işlərin səmərəsi nədir?".
Partiya rəhbəri bildirib ki, Qərbin, Avropanın müəyyən dairələrinin Azərbaycanda kosmopolit düşüncəli qulbeçələri, əlaltıları və şəbəkəsi var:
"O şəbəkə üzvlərinin bu məsələdə səsləri çıxmadı. Artıq hadisə baş verib. Gələcəkdə nə etməliyik, onu düşünməliyik. Biz, Avropa Parlamentinin bu ədalətsiz qərarına etiraz etməklə yanaşı, həm də Avropanın müəyyən strukturları ilə işləməyi də nəhayət öyrənməliyik".
