“Bayraktar AKINCI B” PUA-sının modelinin ilk test uçuşu müvəffəqiyyətlə həyata keçirilib. PUA Türkiyənin "Baykar" şirkətinə məxsusdur. “AKINCI” sinfinin ən güclü və döyüş qabiliyyəti ən yüksək döyüş təyyarəsi kimi xidmət edəcək. Sınaq uçuşu Türkiyənin Tekirdağ vilayətinin Çorlu rayonunda yerləşən Tədris və Test Mərkəzində yerinə yetirilib. Test uçuşu zamanı bu PUA 1 saat 16 dəqiqə havada qalıb.
"AKINCI"nı digər PUA-lardan fərqləndirən əlamətlər barədə "Sherg.az"a danışan hərbi ekspert Ramil Məmmədli bildirib ki, son illərdə Türkiyə Müdafiə Səyanesinin PUA sektorunda inkişafı sürətli templə davam edir:
“Türkiyədə bu sahəyə olan diqqət dünyada olan tələbatdan irəli gəlir. Öz adını müharibələrdə tanıdan “Bayraktar TB-2” PUA-dan sonra Türkiyənin “Baykar” şirkəti yeni layihə üzərində işləməyə başladı.
Son 4 il elmi-nəzəri konstruktor layihələri praktiki formada davam etdirdilər. Nəhayət, martın 2-də ilk sınaq uçuşunu həyata keçirdi.
“Bayraktar AKINCI B” bir sıra xüsusiyyətlərinə görə "Bayraktar TB-2"dən fərqlənir. Birincisi, silah yükü daha çoxdur.
Raketlər gücü ilə digərlərindən fərqlənir. Burada ölçü məsələsi də var.
"AKINCI" kiçik döyüş təyyarəsinə bənzəyir. Bundan başqa havada 25 saat qala bilməsi də onun xüsusiyyətlərindən biridir.
Həmçinin 12 min metr hündürlükdə uçuş tavanına malikdir. Uçuş sürətində də fərq var. “Bayraktar TB-2” saatda 200 kilometr uça bilirdisə, "AKINCI" 2 dəfə ondan daha sürətlidir. Mühərriki böyükdür, amma səsi demək olar ki, eşidilmir.
Hədəfə yalnızca 1500- 2000 metr yaxınlaşdıqda səsi eşidilir. Azərbaycanın da "Akıncı" PUA-na marağı var. İki ölkə arasındakı danışıqlardan sonra ordumuz bu silahla təmin edilə bilər”.
Xanlar ƏLİBƏY
