Hər birimiz yol keçərkən nəinki 2 dəfə, bəzi hallarda hətta 3-4 dəfə düşünməli oluruq. Bunun əsas səbəblərindən biri statistikası durmadan artan yol qəzalarıdır. Demək olar hər gün piyadanın vurulması, dünyasını dəyişməsi xəbərlərini alırıq.
Təbii ki, burada təqsirin birmənalı olaraq hansı tərəfdə olduğunu demək çətindir. Amma bəzən sürücülərlə yanaşı piyadalar da diqqətsizlik edirlər.
Bu cür qəzaların sayının azalması və bədbəxt hadisələrin qarşısının alınması barədə nəqliyyat eksperti İlqar Hüseynli “Sherg.az”a danışarkən bildirib ki, ümumiyyətlə piyada-sürücü münasibətləri qanunla tənzimlənir:
“Hər 2 tərəfin bu məsələdə məsuliyyəti var. Şəhərin prospektlərində piyadaların təhlükəsizliyinin təmin edilməsi məqsədi ilə yeraltı və yerüstü keçidlər mövcuddur. Məsələn “İnşaatçılar”metrosunun bir çıxışında yeraltı piyada keçid fəaliyyət göstərir. Lakin kifayət sayda insan bu keçiddən istifadə etməkdənsə, asfalt yoldan kecməyi üstün tuturlar. Belə hallarda isə qəzalar baş verir. Bu zaman məsuliyyət piyadanın üzərinə düşür. Bir sıra sürücülər var ki, piyadalar üçün nəzərdə tutulan zolaqlarda nəqliyyat vasitəsini saxlamır, hətta sürətlərini belə azaltmır. Piyada isə arxayın olduğundan öz yolunu tutub keçir. Belə hadisələr ömürlük xəsarətlə və ölümlə bitən sonluqlara yol açır”.
Ekspert həmçinin bildirib ki, bu sahədə maarifləndirmə tədbirləri həyata keçirilməlidir:
“Şəhərin nəzarət kameraları ciddi yoxlanılmalı, hərəkət qaydalarını pozan sürücülərlə bağlı ciddi inzibati tədbirlər həyata keçirilməlidir. Cəza tədbirləri çoxalsa, qəzaların qarşısı maksimum alınar”.
Səbinə Elmanqızı
