12 dekabr Azərbaycanın mərhum Prezidenti, görkəmli dövlət xadimi Heydər Əliyevin anım günüdür. Ulu öndərin vəfatından 19 il ötür. Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Ulu öndər 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib.
O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini olub. 1993-cü il iyunun 15-də Azərbaycan Ali Sovetinin sədri seçilən Heydər Əliyev iyunun 24-də Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başlayıb. 1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçilib.
Ulu öndər 1998-ci il oktyabrın 10-da keçirilən növbəti prezident seçkilərində yenidən Azərbaycan Respublikasının Prezidenti seçilib. 2003-cü il oktyabrın 15-də keçiriləcək prezident seçkilərində namizədliyinin irəli sürülməsinə razılıq vermiş H.Əliyev səhhətində yaranmış problemlərlə əlaqədar seçkilərdə iştirak etməkdən imtina edərək namizədliyini İlham Əliyevin xeyrinə geri götürüb.
Xatırladaq ki, uzun müddət ABŞ-nin Klivlend klinikasında müalicə olunan Heydər Əliyev 2003-cü il dekabrın 12-də vəfat edib.
Ulu öndərin ölkəmizin siyasi-tarixində əvəzolunmaz biri olduğunu deyən millət vəkili Sahib Alıyev “Sherg.az”a vurğulayıb ki, Heydər Əliyevin Azərbaycandan qat-qat böyük dövlətlərə rəhbərlik edə biləcək bir lider olduğunu çoxları deyib:
“Amma bunu deyənlər görünür, Ulu Öndərin "Azərbaycan mənim ürəyimdir, Azərbaycan mənim nəfəsimdir, Azərbaycan mənim həyatımdır" sözlərini unudurdular. Unudurdular ki, Azərbaycan onun üçün hər şey demək idi, müqəddəsdi. Müqəddəs saydığın isə ölçüsüz, çəkisiz şəkildə digər hər nə varsa hamısından yüksəkdə olur.
Bir də haqqında danışılan Azərbaycanın aysberqin görünən tərəfi olduğu, alt qatda daha böyük bir məmləkətin gizləndiyi də yəqin diqqətdən qaçılırdı. Əminəm ki, Heydər Əliyev siyasətinin bugünkü kimi uğurlu bir şəkildə davam etdirilməsi nəticəsində Azərbaycanın indi bu ad səslənərkən göz önünə gələndən nə qədər böyük olduğunu hər kəs görəcək.
Onda Ulu Öndərimizin ruhu daha da şad olacaq. Onu sevgi və sayğıyla anırıq”.
