Azərbaycan prosesləri qabaqlamalı, düşmənin dayaq məntəqələri və döyüş postlarının dağıdılmasına başlamalıdır
Azərbaycan və Ermənistan arasında sülh müqaviləsi ilə bağlı növbəti görüş sentyabrda keçiriləcək. Bu barədə Ermənistan hökumətinin xüsusi təyinatlı səfiri Edmon Marukyan deyib. Səfir Ermənistanın sülh prosesindən çıxmadığını, buna sadiq qaldığını iddia edib.
Politoloq Məhəmməd Əsədullazadə isə "Sherg.az"a bildirib ki, indiki halda Ermənistan rəsmiləri ilə görüş, hansısa sülh danışıqları mənasızdır. Analitikin fikrincə, İrəvan "sülh prosesi" açıqlamaları ilə imitasiya ilə məşğul olur: "Ermənistan iki istiqamətdə hərbi eskalasiyaya hazırlaşır. Avrpa İttifaqının mülki missiyasının fəaliyyətindən istifadə edərək Kəlbəcər, Laçın və Zəngilan istiqamətində artilleriya və zirehli texnika cəmləşdirir. Ermənistan rəhbərliyi sülh danışıqlarında maraqlı olsaydı, bu istiqamətdə hərbi qüvvələr cəmləşdirməzdi. Qarabağda da hərbi birləşmələr artilleriya və zirehli texnikaları döyüş mövqelərinə yığır. Ermənistan Azərbaycana qarşı "humanitar yardım" şousundan istifadə edərək beynəlxalq təzyiqin formalaşdırılmasına nail olduqdan sonra, hərbi təxribatları artıra bilər. Azərbaycan prosesləri qabaqlamalı, düşmənin dayaq məntəqələri və döyüş postlarının dağıdılmasına başlamalıdır. Nəticəsiz danışıqlar prosesi ilə Ermənistanı sülh müqaviləsinə imza atmağa məcbur etmək qeyri-mümkündür".
