Ermənistan silahlı qüvvələrinin təxribatları davam edir. Müdafiə Nazirliyinin yaydığı məlumata görə, qarşı tərəf martın 2-si saat 20:50-dən 21:16-dək dövlət sərhədinin Tovuzqala rayonunun Çinarlı yaşayış məntəqəsində yerləşən mövqelərindən Azərbaycan Ordusunun Tovuz rayonunun Koxanəbi və Əsrik Cırdaxan yaşayış məntəqələri istiqamətlərində yerləşən mövqelərini müxtəlif çaplı silahlardan atəşə tutub.
Bu barədə Müdafiə Nazirliyi məlumat yayıb. Ordumuzun qeyd olunan istiqamətlərdə yerləşən bölmələri tərəfindən adekvat cavab tədbirləri görülüb. Azərbaycan Ordusunun sıralarında şəxsi heyət və texnika baxımından itki yoxdur. Hazırda bu istiqamətlərdə vəziyyət sabitdir, əməliyyat şəraiti bölmələrimizin tam nəzarəti altındadır.
Qeyd edək ki, eyni zamanda ötən gün N.Paşinyan “Ermənistanın diplomatiya günü”nə həsr olunmuş tədbirdə çıxışı zamanı Azərbaycanla sülh sazişinin imzalanacağını bəyan edib.
“Gündəlikdə regional kommunikasiyaların açılması, Ermənistan-Azərbaycan sərhədinin demarkasiyası, həmçinin Ermənistan və Azərbaycan arasında sülh müqaviləsinin imzalanması məsələləri var
Ermənistan tərəfinin törətdiyi təxribatların səbəb və nəticələri, eləcə də yekun sülh barədə “Sherg.az”a danışan ehtiyatda olan hərbi jurnalist, Qarabağ qazisi İlham Tumas bildirib ki, bu müqavilə effektiv olmaya bilər:
“Ermənistanla sülh bağlamaq su üstündə yazı yazmağa bərabərdir. Bunu dəfələrlə görmüşük. 20-ci əsrdə erməni-müsəlman müharibəsində də şahidi olmuşuq. Sonuncu dəfə də gördük. Yenə də deyirəm, o dövlət terroçu bir dövlət olduğuna görə, onlarla sülh imzalamaq, hansısa razılığa gəlmək yalnız kağız üstündə mümkündür. Amma imkan düşən kimi Ermənistan zərbə endirməyə hazır bir dövlətdir. Baxın, indiki təxribat da fikirlərimizin sübutu hesab oluna bilər”.
Dünyada baş verən son hadisələrin bu məsələyə təsirindən danışan İ.Tumas hesab edir ki, bu saziş uğurlu adddım deyil:
“Ukraynada baş verənlərin fonunda bəziləri deyir ki, Rusiya məğlub olsa, Ermənistan geri çəkiləcək. Təbii ki, bunlar proqnozlardır. Mən bunları düşünmürəm. Amma hərhalda, indiki məqamda sülh müqaviləsinin uğurlu bir gediş olacağını düşünmürəm. Bir vətəndaş kimi, döyüşçü kimi fikirləşirəm ki, Ermənistanla sülh müqaviləsi imzalamaq mənasız bir işdir və heç nəyə kömək olmayacaq”.
Çimnaz Şahlar
