Moskva Bəyannaməsindən sonra sərhəddəki təxribatlar aradan qalxacaq
“Ermənilərin təxribatlarının qarşısı ciddi və qəti şəkildə alınmalıdır ki, yenidən buna cəhd etməsinlər”. Bunu “Şərq”ə açıqlamasında politoloq Azər Qasımov deyib. Analitik bildirib ki, erməni tərəfinin sərhəd bölgəsində və Qarabağda təxribatları özlərinə təsəlli verməkdən başqa bir şey deyil:
“Ermənilər ümid edirlər ki, Azərbaycan-Ermənistan sərhədində vəziyyət gərginləşəcək və bundan yararlanacaqlar. Artıq bu köhnə metodlar keçmir. Azərbaycanın Rusiya ilə imzaladığı Moskva Bəyannaməsindən sonra bu kimi təxribatlar aradan qalxacaq. Nə qədər inanması çətin olsa da, Kreml bu məsələdə öz imzasına hörmət edəcək və təxribatçı qüvvələri Qarabağdan çıxaracaq”.
A.Qasımova görə, Ukraynada baş verən hadisələr bir daha dünyada heç nəyin göründüyü kimi olmadığını göstərir: “Rusiya separatçıları tanıyır, onlara açıq və gizli dəstək verir. Ona görə də Rusiyanın, Qərbin təhrik və “dəstəyinə” arxayın olmamaq, kimlərinsə oyununa gəlməmək üçün öz maraqlarımız çərçivəsində hadisələrə qiymət verməliyik”.
