Müxtəlif sosial şəbəkələrdə narkotik maddələrin təbliğinin, satışının həyata keçirilməsi hallarını tez-tez müşahidə edirik. Narkotik maddələrin internet üzərindən satışını önləmək üçün cinayət məcəlləsinə dəyişiklik təklif olunub.
Dəyişikliyə görə, narkotik vasitələri və psixotrop maddələri internet üzərindən satanlar 5 ildən 12 ilədək müddətə azadlıqdan məhrumedilmə ilə cəzalandırılacaq. Zəhərli maddələrin satış məqsədilə qanunsuz dövriyyəsi ilə məşğul olanları isə 10 il həbs gözləyir.
Cinayət məcəlləsinə edilən dəyişikliklə bağlı "Sherg.az"a danışan hüquqşünas Ələsgər Məmmədli bildirib ki, narkotik satışının qarşısını almaq çətindir:
“Hamımız bilirik ki, narkotik vasitələrin dövriyyəsi qadağandır. Amma zərərli maddələri satanların qarşısını almaq praktikada mümkün olmur. Belə adamlar hər yola əl atır. İnternet üzərindən satış həyata keçirənlər də az deyil.
Bunun qarşısının alınması üçün müəyyən addımlar atılır. Məsələn onlar istifadə etdikləri elektron vasitənin İP-si üzərindən rahatlıqla izlənilirlər. İnternet olmazsa, gedib başqa yol tapacaqlar.
Cəzalandırma üçün cinayət məcəlləmizdə konkret hökmlər yoxdur. Ona görə də, hakim vəziyyəti qiymətləndirərək cəza barəsində qərar verir.
Onların əvvəllər məhbus olub-olmadıqları, təhlükənin dərəcəsi ölçülür”.
Xanlar ƏLİBƏY
