Bu gün Türkiyənin İstanbul şəhərində Ukrayna Mədəniyyət Dərnəyi, Krım Türkləri Dərnəyi və bir neçə qeyri hökümət təşkilatının Rusiya Federasiyasının İstanbuldakı Baş Konsulluğu qarşısında birgə düzənlədiyi “Ukraynaya dəstək” mitinqi keçirildi. Hər iki dərnəyin təmsilçiləri – Aliya Usenova və Celal İçten ailələrinin və qohumlarının yaşadığı Ukraynanın bu gün rus işğalına məruz qaldığını və rus silahlı qüvvələrinin Ukraynada törətdiyi vəhşiliklərin insanlığa sığmayan bir hüquq pozuntusu olduğunu söylədilər.
“Qatil Putin Ukraynadan əlini çək”, “Ukrayna qalibdir”, “Rus anaları evladlarınız sağ ikən geri çağırın”. “Türkiyə qardaşına yardım et, Bosfor boğazını bağla” şüarları ilə dörd saat davam edən mitinqə İstiqlal küçəsindən keçən şəhərin qonaqları da qatıldılar.
Ən çox diqqətimi çəkən iki nəfər rus qadının (birisi xüsusilə bu mitinqdə iştirak etmək üçün Rusiyadan gəlib) söylədikləri oldu; rus olduğum üçün utanıram, qətiyyən bu müharibənin olmasını istəmirik, rus gəncləri adından Ukrayna xalqından üzr istəyirik, Ukraynanın yanında olmaq üçün buradayıq.
Mitinqlər həftə sonları da davam edəcək.
Yaqut Misirxanlı
Xüsusilə “Şərq” qəzeti üçün İstanbuldan
