"Moskva Bəyannaməsi"ndə separatizmə qarşı mübarizə ilə bağlı bənd var”
“Sənədin əsasında ərazimizdə, xüsusilə Rusiya sülhməramlılarının nəzarəti altında olan bölgələrdəki separatçılar həbs ediləcək”
Fevralın 22-də İlham Əliyev və Vladimir Putin "Moskva Bəyannaməsi"ni imzalayıb. “Azərbaycan Respublikası və Rusiya Federasiyası arasında qarşılıqlı müttəfiqlik fəaliyyəti haqqında” müqavilə Rusiya və Azərbaycan münasibətlərinin inkişafına təsir göstərəcək. Sənəd regional və beynəlxalq təhlükəsizliyin və sabitliyin təmin edilməsinə və möhkəmləndirilməsinə töhfə verəcək. Bəyannamə də iki ölkənin siyasi, iqtisadi, müdafiə, mədəni, humanitar, təhsil, sosial sahələrdə, eləcə də səhiyyə və idman sahəsində əməkdaşlığının genişləndirilməsi planlaşdırılır.
Bəyannamənin iki ölkə arasındakı münasibətlərə necə təsir edəcəyi ilə bağlı "Sherg.az"a danışan millət vəkili Asim Mollazadə bildirib ki, müqavilə İrəvanın Qarabağ iddiasına nöqtə qoydu:
“Sənəddə çoxşaxəli əməkdaşlıq nəzərdə tutulub. Həm nəqliyyat, həm enerji, həm də mədəniyyət sahəsində birgə əməkdaşlıq planlaşdırılır.
Həmçinin müqavilədə göstərilib ki, Azərbaycanın ərazi bütövlüyü Rusiya tərəfindən tanınır və dəstəklənir. Bu sənədlə Ermənistanın Qarabağ məsələsini gündəmə gətirməsinin üzərindən də xətt çəkildi.
"Moskva Bəyannaməsi"ndə separatizmə qarşı mübarizə ilə bağlı bənd var.
Sənədin əsasında ərazimizdə, xüsusilə Rusiya sülhməramlılarının nəzarəti altında olan bölgələrdəki separatçılar həbs ediləcək.
Bəyannamənin imzalanması Türkiyə-Rusiya münasibətlərinə də müsbət təsir göstərəcək. Azərbaycan iki dövlət arasındakı əlaqələrin tənzimlənməsini təmin edə bilər”.
Xanlar ƏLİBƏY
