NATO-ya üzv ölkələrin müdafiə nazirləri alyansın Belçikanın paytaxtı Brüsseldəki mənzil-qərargahında toplanıblar. Rusiyanın Ukraynaya hücumlarına son qoymaq səylərinin müzakirə olunacağı toplantı baş katib Yens Stoltenberqin iştirakı ilə keçirilir.NATO-nun iclasına alyansa üzv olmayan Ukrayna, Gürcüstan, İsveç və Finlandiyanın müdafiə nazirləri, həmçinin Avropa İttifaqının xarici əlaqələr və təhlükəsizlik siyasəti üzrə ali nümayəndəsi Cozef Borrel də dəvət olunub.
İclasdan əvvəl NATO-nun baş katibi Stoltenberq ABŞ-ın müdafiə naziri Lloyd Austin ilə birlikdə jurnalistlərə açıqlamasında Rusiyanın Ukraynaya hücumunu “amansız işğal” adlandırıb.
Böhranın Ukrayna hüdudlarından kənara çıxmaması üçün məsuliyyətin NATO-nun üzərinə düşdüyünü bildirən Stoltenberq qurumun alyansın şərqindəki varlığını artırdığını qeyd edib.
Görüşü “Sherg.az”a izah edən siyasi şərhçi Rusif Məmmədsoy Vladimir Putini məğlub kimi dəyərləndirib:
“Hazırda dünyada çox ciddi proseslər baş verir. Dünya böyük bir təhdidlə qarşı-qarşıyadır. Bu da nüvə silahı və onu hər an hərəkətə gətirə biləcək Vladimir Putindən ibarətdir. NATO ölkələrinin əsas müzakirə mövzusu da məhz bu istiqamətdə olacaqdı. Hər kəsi bir sual düşündürür. Putini necə dayandıraq? O, indiki vəziyyətdə hər şeyə hazır görünür. Çünki hansısa bir çıxış yolu yoxdur.
Rusiya faktiki olaraq Ukraynaya hücumla siyasi, iqtisadi və strateji məğlubiyyətə uğrayıb. Bütün bu baş verənlərdən sonra rəsmi Moskva ilə Ukrayna arasında sülh müqaviləsi imzalansa belə, Vladimir Putin bunun cavabını öz cəmiyyətinə verə bilməyəcək”.
Siyasi şərhçi vurğulayıb ki, Qərb NATO ölkələrini qorumaq üçün diqqətli olmalıdır:
“Bu mənada Qərb NATO ölkələrinin təhlükəsizliyi ilə bağlı bir daha fikirləşməlidir. Hətta Volodimir Zelenski də açıqlaması zamanı bildirib ki, əgər Putini dayandırmasanız, növbəti hədəf Şərqi Avropa ölkələri, Polşa və.s olacaq. Həmin görüşün məğzini toxunduğum nüanslar xüsusilə təşkil edir”.
