“O ki qaldı qayıdışa, bu, zaman məsələsidir. Kimin nə istəməyindən asılı olmayaraq, Zəngəzur dəhlizi açılacaq, qayıdış baş tutacaq”
Avropa Parlamentinin üzvü Natali Luazo “Armenpress”in müxbiri ilə söhbətində bildirib ki, "Qərbi Azərbaycan" və ya "dəhliz" rəvayətlərinin (?) sülh danışıqlarında yeri olmamalıdır. Onun fikrincə, Ermənistanla Azərbaycan arasında münasibətlərin normallaşdırılmasına dair danışıqlarda “Qərbi Azərbaycan” və ya “dəhliz” məsələləri kənara qoyulmalıdır. Ermənipərəst mövqeyi ilə çoxdan tanıdığımız Avroparlamentin deputatı daha sonra ərz edib ki, heç bir ilkin şərt irəli sürülmədən, Ermənistanın suverenliyinə hörmət edən sülh sazişinin müsbət nəticəsi ola bilər.
Sonra sözlərinə əlavə edib ki, Ermənistan və Azərbaycan arasında sabit sülh hər iki ölkənin mənafeyinə uyğun olmalıdır: “Ermənistan və Azərbaycan arasında davamlı sülh hər iki ölkənin ümumi məqsədi olmalıdır. İndiyə qədər Ermənistan xoşməramlılığını və güzəştə getməyə hazır olduğunu nümayiş etdirib. Azərbaycan buna dərhal adekvat şəkildə cavab verməlidir”.
Qeyd edək ki, Avropa Parlamenti bir neçə gün öncə ölkəmizə qarşı növbəti qətnamənin qəbulu ilə yadda qalıb. Qətnamədə adəti üzrə saxta məlumatlara və rəqəmlərə istinad edilib, reallıqlar təhrif olunub, qanunların pozulmasına gətirib çıxarmış cinayət əməllərinin təhqiqatına siyasi don geyindirilməyə cəhd göstərilib. Qəbul edilmiş qətnamənin nə dərəcədə qərəzli olduğunu anlamaq üçün təkcə belə bir faktı qeyd etmək lazımdır ki, ölkəmizin ərazisində insanlıq əleyhinə cinayət törətməkdə təqsirləndirilən keçmiş separatçı rejimin nümayəndələri və terrorçular bu sənəddə “erməni hərbi əsirlər” kimi təqdim olunur. Qərbi Azərbaycan İcmasının Avropa Parlamentinin növbəti qətnaməsi əleyhinə yaydığı bəyanatında deyilib ki, Avropa Parlamenti bu gün qəbul etdiyi qətnamə ilə bir daha Azərbaycana qarşı bitib-tükənməyən nifrətini nümayiş etdirdi. Bəyanatda, həmçinin bildirilib ki, bu həmin Avropa Parlamentidir ki, 1988-ci ildə biz Qərbi azərbaycanlılar Ermənistan tərəfindən öz dədə-baba yurdlarımızdan deportasiya edilərkən nəinki bunu pisləyib, əksinə, keçmiş “Dağlıq Qarabağ Muxtar Vilayəti”nin Ermənistana birləşdirilməsinə çağırıb: "Budəfəki qətnamədə hərbi canilərə, Xocalı, Qaradağlı, Ağdaban qatillərinə simpatiya ifadə etməsi ilə Avropa Parlamenti zaman dəyişsə də, xislətinin dəyişmədiyini göstərmiş oldu".
Bakı Politoloqlar Klubunun sədri Zaur Məmmədov deyib ki, Qərbi Azərbaycan normativi Fransanı narahat edir. Ekspertin sözlərinə görə, Fransadakı erməni diasporasını tarixi torpaqlarımıza qayıdışımız narahat etməkdədir:
"Qarabağ erməniləri məsələsinə mütəmadi olaraq toxunan, onlarla bağlı bəyanat verən fransız deputatlar çox yaxşı bilməlidirlər ki, yerli xalq olan azərbaycanlılarla erməniləri müqayisə etmək absurddur. O ki qaldı danışıqlara, ehtimal edirəm ki, Ermənistanın özünü qeyri-adekvat aparması fonunda ölkəmiz tərəfindən tələblərlə bağlı yeni açıqlamaları eşidəcəyik. Lakin bundan qabaq qeyd edim ki, hazırda Azərbaycan və Ermənistan arasında razılaşdırılmamış məqamlardan biri - şərti sərhədlər yaxınlığında xarici qoşunların yerləşdirilməməsidir. Buna əlavə olaraq, rəsmi Bakı tərəfindən bu il ərzində azı 3 dəfə sərhədlər yaxınlığında məğlub dövlət tərəfindən ağır hücum xarakterli silahların yerləşdirilməsinin yolverilməz olduğu, delimitasiyanın zəruri olduğu bəyan edilib. Bu və ya digər tərəfdən, aydın olan bir məqam var. Qərbi Azərbaycanda xarici ölkələrin hərbçiləri olmamalıdır, bölgə silahsızlaşdırılmalıdır. O ki qaldı qayıdışa, bu, zaman məsələsidir. Kimin nə istəməyindən asılı olmayaraq, Zəngəzur dəhlizi açılacaq, qayıdış baş tutacaq".
