Mayın əvvəllərindən gec olmayaraq sülh razılaşması reallaşa bilər
Davamlı görüşlərdə nümayəndələr ortaq məxrəcə gəlməyin mümkünlüyünü görüblər
Rusiya ilə Ukrayna arasında razılaşma 1-2 həftə ərzində imzalana bilər. Bu barədə Ukrayna prezident ofisinin rəhbərinin məsləhətçisi Aleksey Arestoviç deyib. O bildirib ki, mayın əvvəllərindən gec olmayaraq, sülh razılaşması reallaşa bilər: “Ən uzaq tarixi götürürəm”. Ukrayna Prezidenti Vladimir Zelenskinin ofisinin direktor müavini İqor Jovka da deyib ki, Rusiya daha konstruktiv mövqe nümayiş etdirir.
O bildirib ki, rəsmi Moskvanın mövqeyinin əvvəlkilərlə müqayisədə daha konstruktiv olduğuna inanır: “Ultimatumlar vermək, “qırmızı xətt”lər və ya kapitulyasiya istəmək əvəzinə, indi onların konstruktiv danışıqlara başladığı görünür”. Rusiyanın Xarici işlər naziri Sergey Lavrov isə vurğulayıb ki, danışıqlar Ukraynanın neytral statusunun təmin edilməsinə istiqamətlənib. Qeyd edək ki, Rusiya ilə Ukrayna nümayəndə heyətlərinin danışıqlarının 5 raundu keçirilib.
Rəsmi Kiyevin Rusiyanın mövqeyi ilə bağlı bəyanatlarını “Şərq”ə dəyərləndirən politoloq Turab Rzayev bildirib ki, Kreml Ukrayna qarşısında çox ağır şərtlər qoymuşdu. Ekspert xatırladıb ki, Moskva Krımın “Rusiya ərazisi” kimi tanınmasını, Donbasdakı separatçı “respublikaları”nın “müstəqilliyi”, ordunun tərksilah edilməsi, Qərbə təmas olunmaması mümkünsüz tələblər idi:
“Kiyev bunların heç birini qəbul edə bilməzdi. Zelenski hökuməti Kremli sülh istəməməkdə, sadəcə vaxt qazanmağa çalışmaqda ittiham edirdi. Görünür, gedişatı nəzərə alan Moskva bəzi şərtlərini yumşaldıb, yaxud vaz keçib. Davamlı görüşlərdə nümayəndələr ortaq məxrəcə gəlməyin mümkünlüyünü görüblər. Yumşalma prosesində Antalya Forumunun da rolu istisna deyil. Məhz Ankaranın vasitəçiliyi ilə Lavrovla ukraynalı həmkarı bir araya gələ bildi. Rusiyanın daha normal tələblər irəli sürməsi Kiyev tərəfindən yumşalma kimi dəyərləndirilir”.
