“Ukrayna barədə təxribatçı yayımlarına görə Semyon Peqovun “WarGonzo” kanalı bloklanıb. Bəli, erməni media maqnat Aram Qabrelyanovun himayəsi altında fəaliyyət göstərən Semyon Peqov həqiqətən də təxribatla məşğuldur”.
“Sherg.az” xəbər verir ki, bu barədə Mətbuat Şurasının sədri Əflatun Amaşov deyib.
MŞ rəhbəri bildirib ki, biz Peqovu İkinci Qarabağ Müharibəsi dönəmində də görmüşdük:
“Məsələ ilə bağlı müraciətlər yayımlamışdıq, çağırışlar etmişdik. Hətta Azərbaycan dövləti tərəfindən Peqova qarşı Azərbaycanda müvafiq maddələrlə cinayət işi də başlanıldı. Təəssüf ki, diqqət yetirən olmadı. Amma baxın ki, Ukraynaya çatanda Peqovun kanalı bloklanır. Burada ikili yanaşmanın olduğu göz önündədir. "WarGonzo" Azərbaycanın beynəlxalq səviyyədə tanınmış torpaqlarında destruktiv media fəaliyyəti ilə məşğul olduğu nəzərə alınmamışdı. İndi isə ən konkret qərar verilir və kanal barədə mümkün olan ən yüksək cəza tədbiri görülür. Sual olunur, nə üçün Qarabağ müharibəsi zamanı eyni addım atılmadı? Əslində sual ritorikdir. Cavab gözləmirəm.
Çünki heç bir cavab haqqında söz açdığım ikili yanaşmanın olmadığını, ayrıseçkiliyin qoyulmadığını bildirə bilməyəcək. Hər şey gün kimi aydındır”.
