Azərbaycan qanunları ilə yaşamaq istəməyənlərin ərazimizi tərk etmələrinin alternativi yoxdur
Çoxdan gözlənilən bir prosesin ilk fraqmentləri artıq gerçəkləşməyə başlayıb. Azərbaycan qanunlarını qəbul etməyən separatçılar Qarabağı tərk edirlər. Ötən gün təxminən 60-a yaxın erməni əsilli şəxs Azərbaycanın tarixi torpaqlarını tərk edərək Ermənistana və ya Rusiyaya üz tutub. Bu şəxslərin məhz Moskvanın məlum planı əsasında sonradan Rusiya vətəndaşlığını qəbul edərək, Qarabağda separatçılıq fəaliyyətlərini davam etdirən ermənilər olduğu şəksizdir. Bu, Moskvanın köhnə taktikasıdır.
Kreml separatizmi qızışdırdığı postsovet respublikalarının “qaynar nöqtə”lərində separatçılara Rusiya pasportu paylamaqla onların timsalında yerli hökumətlərə qarşı “yumşaq güc”, təzyiq vasitəsi formalaşdırırdı. Bu hallara Dnestryanı ərazidə də, Abxaziya və Cənubi Osetiyada da, Luqansk və Donetskdə də rast gəlinib.
Azərbaycan Həmrəylik Komitəsinin sədri, siyasi şərhçi Əlisahib Hüseynov "Sherg.az"a deyib ki, Qarabağdakı separatçı ermənilərə rus pasportlarının verilməsi və saxta “rus icması”nın formalaşdırılması da Kremlin Bakıya qarşı gələcək təzyiq vasitələrindən biri kimi nəzərdə tutulurdu.
Ekspertin sözlərinə görə, bu dəfə Moskvanın variantı özünü doğrultmadı: "Çünki Bakının tam da zamanında atdığı çevik önləyici tədbirlər, o cümlədən, Ermənistanla sərhəddə “Laçın” nəzarət-buraxılış məntəqəsinin qurulması tamamilə yeni reallıqlar formalaşdırdı. Bu nə Moskvanın, nə də separatçıların gözləmədiyi reallıqlardır.
Onlar yeni reallıqlarla barışmaq və buna uyğun davranmaq məcburiyyətindədirlər. Qarabağdan erməni köçünün başlanması da məhz bundan qaynaqlanır. Beləliklə, Qarabağda guya 120 min erməninin yaşadığı barədə uydurulan mif də iflasa uğrayır. Onların real sayının 120 min deyil, uzağı 25-30 min nəfər olması faktı tezliklə öz təsdiqini tapacaq. Bakının təklifi əsasında seçim qarşısında qalan, ya reinteqrasiya yolunu tutmalı olan, ya da ki ərazilərimizi tərk etmək tələbi ilə üzləşən Qarabağdakı ermənilərin bir qismi indi çıxış yolunu məhz Xankəndini tərk etməkdə görür. Belə də olmalıydı. Çünki heç bir erməniyə Azərbaycan ərazilərində yaşayıb, Azərbaycan qanunlarına tabe olmamaq ixtiyarı verilməyəcək. Odur ki, separatçılığa meyilli olan ermənilər Azərbaycanın yaratdığı yeni reallıqların məsuliyyətindən qaçırlar".
Analitikin fikrincə, bu, separatçı ermənilərin toplu köçünün sadəcə başlanğıcıdır: "Prosesin qarşıdakı həftələrdə davam edəcəyi şübhə doğurmur. Azərbaycan qanunları ilə yaşamaq istəməyənlərin ərazimizi tərk etmələrinin alternativi yoxdur. Sözsüz ki, Azərbaycan qanunlarını qəbul edən, ərazi bütövlüyümüzə və suverenliyimizə hörmətlə yanaşan mülki ermənilər Qarabağda qalıb bizim vətəndaşlarımız kimi yaşaya biləcəklər. Xalqımıza qarşı müharibə cinayətlərində iştirak edən və bu gün də separatçılıq fəaliyyətlərindən əl çəkmək istəməyən radikal-millətçi ermənilər isə bir gün ədalət məhkəməsinin qarşısına çıxarılacaqlarını əsla unutmamalıdırlar".
