"Rusiyanın Ukrayna üzərinə göndərib məhv etdirdiyi hərbçilərin əksəriyyəti türklərdir"
Tanınmış tarixçi-alim, professor, sabiq deputat Nəsib Nəsibli Türk Dövlətləri Təşkilatının (TDT) Rusiya-Ukrayna müharibəsi ilə bağlı konkret mövqe sərgiləməsinin vaxtının çatdığını deyib. Alim vurğulayıb ki, Türk Dövlətləri Təşkilatının zirvə toplantısının tam zamanıdır. Hətta Nəsib Nəsibli bunun üçün kifayət qədər gec qalındığını bildirib: “Türk Dövlətləri Təşkilatı Ukrayna savaşına ortaq münasibət bildirməklə varlığını xatırlatmış olardı. Onlayn konfransla yumşaq da olsa bəyanat vermək mümkündür”.
Tarixçi-alimin təklifini “Şərq”ə dəyərləndirən siyasi şərhçi Azər Həsrət bunun müsbət təşəbbüs olduğunu deyib. Analitikə görə, ümumiyyətlə, Rusiya-Ukrayna müharibəsi və bənzər böyük hadisələrdə Türk Dövlətləri Təşkilatı məsləhətləşmələr aparmalı, ortaq mövqedən çıxış etməlidir:
“Prosesdə Türkiyə onsuz da fəaldır və Kiyevlə Moskva arasında vasitəçilik etməyə çalışır. Bunlar müsbət məqamlardır. Amma TDT regional təşkilat kimi belə məsələlərə mövqe sərgiləməlidir. Söhbət ondan getmir ki, mütləq kimisə, hansısa tərəfi ittiham etməliyik, yaxud kiminsə tərəfini tutmalıyıq. Ən azından təşkilat olaraq münaqişə tərəflərini ortaq məxrəcə gələrək problemləri dinc yolla həll etməyə çağıra bilərik. Yumşaq diplomatiya dili ilə belə bir çağırış mümkündür. Kimsə deyə bilər ki, türk dövlətləri hara, Rusiya, Ukrayna hara?! Bu, belə deyil. Həm Rusiya, həm də Ukrayna tərkibində türk toplumları var. Şəxsi müşahidələrimə görə, Rusiyanın Ukrayna üzərinə göndərib məhv etdirdiyi hərbçilərin əksəriyyəti türklərdir. Çoxu tatarlar, çuvaşlar, başqırdlar, noqaylar, qaraçaylar, balkarlardan ibarətdir. Sanki qəsdən, seçərək göndərirlər. Ona görə də TDT bu müharibənin bir an öncə dayandırılmasına, problemin masa arxasında çözülməsinə çağırış etməlidir”.
